Адилянгыюртлу Гьарун Гьайдакъов да шо мен оьрде эсгерип гетген кёплер  сайлагъан ва сайлайгъан ёлдан юрюмей, юрегини сесине гёре, яшдан берли гьасирет ёлну танглагъан. Ингдеси, ол шогъар бир де гьёкюнчлю де  къалмагъан.
    Ёкъ, ол къолуна савут да алып, Ватанны думашманлары булан дав да этмей, сан да сёкмей. Амма Ватаныбызны зор асгерине ону къуллугъу да тарыкъ. Нечик-мечик де тюгюл, бек тарыкълы. Неге тюгюл де, ону эмли къолларындан Ватанны якълавчуларыны савлугъу гьасил. Ол – асгер врач-терапевт. 
    Озокъда, яш вакътисинде, юрт школада охуйгъан йылларында ол оьзюн яшавну ташгъынлы толкъунлары ата юртундан йыракъгъа ташлажакъны билмеген буса да ярай. Амма врач касбу, адамны оьлюмден къутгъарыв ва элине бакъгъан сююв ону даимликге Ватаныбызны якълавчулары булан тыгъыс байлагъан.
    Гиччиден тутуп да ол врач касбугъа муштарлы болуп оьсе. 1985-нчи йылны октябр айыны ахырында адилянгыюртлу Абдулзагьир ва Маржанат Гьайдакъовланы агьлюсюнде тувгъан Гьарунну яшав яшлайын ата юртундан, азиз Дагъыстанындан арекге чыгъара. Школагъа да ол Кострома областны Пыщуг районуну Головино деген юртунда юрюмеге башлай.  Гьарунну атасы Абдулзагьир Гьайдакъов эсгерилген юртдагъы «Рассвет» деген колхозда хыйлы йыллар баш зоотехник, сонгунда колхозну директору, ашамлыкъ малланы тёшлейген конторну ёлбашчысы болуп ишлеген.
    Гьарун 9 класны да  оьр къыйматлар булан Головинода тамамлай. Юрек тартып, ол гьеч ойлашмай, 2000-нчи йылда Кострома областны Шарья деген шагьарындагъы медучилищеге охумагъа тюше.
    – Гьарун башдан тутуп да янгыз врач касбугъа ес болмагъа сюе эди, – деп хабарлай мени булан Гьарунну атасы Абдулзагьир Гьайдакъов. – Медучилищеге буса оьзю сююп, институтгъа тюшмеге енгил болсун учун тюшдю.
    Гьарун янгылышмай. Медучилищеде охуйгъан йылларында оьзюн янгыз яхшы якъдан танытмагъа бола. Бары да затдан алда билим якъдан да, спорт якъдан да. Гьакъыкъатда, 2003-нчю йылда Гьарун медучилищени къызыл дипломгъа тамамлай. Ону алдында институтгъа элтеген ёл эркинине ачыла.
    – Гьарун яшдан берли доктор болмагъа гьасирет эди, – деп узата мени булангъы лакъырында Абдулзагьир Гьайдакъов. – Ону асгерде къуллукъ этегенлеге де гёзю къарай эди. Шолайлыкъда, ол асгер врач болмакъны юрегине алды. Шарьядагъы медучилищени битген йыл ол кёп ойлашмай, Томск шагьардагъы асгер медицина институтгъа документлерин берди.
    Абдулзагьир Гьайдакъовну сёзлерине гёре, Гьарун эсгерилген институтгъа тынч­лыкъда тюшмей. Бир ерге кёп яш тюшмеге умутлу буса да, шоланы арасында Гьарун экзаменлени яхшы къыйматлар булан бере. Амма шонда да ол дагъыстанлы экени ону булан яман оюн ойнамагъа аз къала. Студентлени къабул этеген комиссия Гьарунну не себеплер табып да институтну абзарындан арекде къоймагъа къасткъыла. Амма бажарылмай. Арадан хыйлы заман гетген сонг, Гьарунну тувра ёлбашчысы бир вакътилерде ону учун комиссияны алдында янын тутуп сёз айтгъанны хабарлай.
    Гьарун буса охувда да, спортда да ёлбашчысына сёз тиймейген кюйде чалыша. Къаркъарасы гюч ала, сангъа гире. Спорт охувдан сонг ону учун экинчи ерде болуп токътай. Мазаллы, гючлю-къуватлы Гьарун охуп турагъан вакътини ичинде ротаны ёлбашчысыны спортгъа къарайгъан орунбасары болуп да чалыша. Билимде буса ол барындан да алда. 2008-нчи йылда Томск медицина институтну къызыл дипломун алгъан Гьарун Гьайдакъовгъа бирев де,  бир вакътилерде ону институтгъа къабул этмеге сюймегенлер де тамашалыкъ этмей.
    Яш лейтенант, асгер врач-терапевтни шо йыл Ленинград асгер округгъа бакъдыра. Выборг шагьарны Каменка деген посёлогундагъы госпиталында оьзюню сююмлю касбусун юрютмеге башлай.
    Медицина касбугъа ес болгъан Гьарун билимин дагъы да теренлешдирмеге къасткъыла. Ол оьзюню алдына етишмеге янгы оьрлюк сала – медицина академия. Ол оьзю ва оьзюню асгер ёлдашлары учун асгер врач-хируг болмакъ пайдалы экенни гьар гюнлюк ишинде де ташдыра.
    Медицина академия болмаса да, ол 2013-нчю йылда ишлеп турагъан кюйде охуп, Ленинград гюмрюк (таможня) академиясын битдире. Шо йыл огъар капитан чин де бериле.
    Оьзюню алдына салынгъан умутгъа етишмек учун не ёлгъа тюшме де тартынмайгъан яш капитан оьрде токътагъан командованиени де бек кепине геле. Ондан къайры да, Гьарун ишинде де бажарывлу. Гьасили, узакъ къалмай, Гьарунну алдында янгы оьрлюк ачыла: ону медицина ротаны командири этип белгилей.
    Бугюнлерде Гьарун Гьайдакъов заманлыкъгъа медицина бригаданы ёлбашчысыны борчларын юрюте. Гьарун Гьайдакъовну атасы Абдулзагьир мюкюр болгъан кюйде, ол бу йыл гьалиден 5 йыл алда охувун узатмагъа умутлу болгъан Ленинград медицина академиягъа тюшмеге къастлы.
    – Шогъар энни бир зат да, бирев де четимлик этмеге болмас деп ойлашабыз, – дей Абдулзагьир Гьайдакъов. – Гьарун оьзю де масхара этеген кюйде, ол Адил Янгыюртдан чыкъгъан биринчи медицина къуллукъну полковниги болажакъгъа умутлубуз.
    Шо умутгъа етишмеге буса аз къалмагъан. Амма алгъа алынагъан шо абатлар Гьарун учун нечик къыйынлыкъда оьтгенни ол оьзю биледир. Балики, ону командирлери де… Айтагъаным, етишип гелеген Ватанны якълавчусуну гюнюне байлавлу болуп ону погонларын майорну юлдузу беземеге герек.
    Бизге буса Гьарунгъа юрегиндеги умутлагъа етишмекни ва уллу Ватаныбызны лайыкълы якълавчусу болмакъны ёрамакъ къала.