Гьаракатчы ва бажарывлу касбучу




Биз, ата-аналар, бир-бирде школаны охуп битген сонг, яшны оьзюню пагьмуна гёре, оьзю сюеген касбугъа охума барма къоймай, биз онглу гёреген касбугъа охума бакъдырабыз ва ону къысматына шайлы четимликлер къурабыз. Муна гьали биз де шолай яшавну бир нече сокъмагъындан оьтген сонг, оьзюню герти ёлуна тюшюп, ишинде яхшы уьстюнлюклеге етген, халкъны арасында яхшы сый-абур къазангъан борагъанлы Майса Бабутаеваны (Зубайраева) гьакъында язмакъны пайдалы гёрдюк.


М.А.Бабутаева 1971-нчи йыл Борагъан орта школаны 1-нчи класына охума бара. 1-нчи класдан башлап да, лап оьр къыйматлагъа охуй. 5-нчи класдан башлап, чебер охувгъа гьаваслыкъ тува. Тез-тез чебер конкурсларда ортакъчылыкъ эте, хоргъа юрюп башлай, сагьна яшавну сююп къала.


– Москвадагъы театр институтгъа бармагъа сюйген эдим. «Артист пагьму сагъа муаллим касбуда да кёп тарыкъ болажакъ, муаллим касбугъа бар», – деп, анам оьзюнден йыракъгъа чыгъарма сюймеди, – дей Майса Агьматовна. Ону атасы да, анасы да кёп яхшы муаллимлер эди.


1982-нчи йыл Майса Мычы­гъыш-Ингуш пединститутну филология факультетине охума тюше. Онда уьстюнлю кюйде охуй экен, оьзю кёп сюеген чебер кружокгъа къасткъылып юрюй. 1987-нчи йыл институтну уьстюнлю кюйде де битип, Борагъан школаны 5–6-нчы класларында орус тилден дарслар юрютюп башлай. Тюзю, школаны администрациясы да, сынавлу муаллимлери де ону дарсларына рази къалалар, гертиден де, артист пагьму да муаллимни ишинде берекетли кюйде тарыкъ экен… 2005-нчи йыл агьлюсю булан Гюйдюрмесге гёче. Онда Гюйдюрмесни маданият уьюнде методист болуп ишлеме башлай. Мунда ол хыйлы затгъа уьйрене ва оьзюн де гьаракатчы ва англавлу, билимли касбучу гьисапда танытмагъа бажара.


2010-нчу йыл Гюйдюрмес район администрацияны маданият бёлюгюню башчысы Руслан Бабишевни къаныгъывлу кюйде тилевюне байлавлу М.Бабутаева Борагъан маданият уьйню директору болуп ишлеме башлай. Маданият уьйню чалы-чаманындан, абзарындан башлап, ич гёрюнюшюне ерли барын да онгара, янгы техника къураллар, мебель булан ясандыра, касбучулар къошдура.


Маданият уью толу кюйде ишлемеге башлай: бийив, хор, драма кружоклар ишлей. 5–8-нчи класланы охувчулары къуршалгъан «Миротворчество и толерантность» деген миллетлени дослугъуна къуллукъ этеген кружокну да оьзю юрюте. Аз заманны ичинде хыйлы тутумлу ва къужурлу гьаракатлар оьтгермеге бажара. Оланы санавунда – къумукъ ва мычыгъыш журналистлер, ерли язывчулар булан, Ватан давну ортакъчылары булан ёлугъувлар кёп арив оьтдю. Районну даражасында оьтген охувчуланы КВН-ин, М.Ю.Лермонтовну 200 йыллыгъына багъышлангъан ахшам, Анвар Гьажиевни 100 йыллыгъына ва ерли шаир З.Х. Хубиеваны яратывчулугъуна багъышлангъан ахшамлар да уллу иш къурумлу ва къужурлу оьтдю. Бу гьаракатланы барысында да чебер яратывчу кружокланы членлери оьзлени йырлары, бийивлери, Майса Агьматованы ерли яшавгъа багъышлап язгъан гиччирек пьесаларыны сагьналашдырып оьтгерген гьаракатлары къаравчулагъа таъсир этдилер.


2016-нчы йыл къурулгъан «Яшлыкъны дериясы» деген хор коллективи буса район, республика, Темиркъазыкъ-Кавказ регион хор коллективлерини фестивалларында уьстюнлюк алып, 11-нчи декабрде Темиркъазыкъ-Кавказ регионну атындан Москвада оьтгерилген Бютюнроссия халкъ хорларыны фестивалында ортакъчылыкъ эте. Онда «Къумукътюзюм» (къумукъ), «Сан Даймохк» (мычыгъыш), «Гандагане» (гюржю) йырланы йырлагъанлар. Хор коллективни бай, ренкли чыгъагъан йырлары тынглавчуланы гьайрангъа къалдыргъан, йыр саниятны герти кюйде англайгъан жюрини членлерин къувандыргъан. Бу фестивальда 50-ге ювукъ коллективлер ортакъчылыкъ этгенни эсгерсек, «Яшланы дериясы» экинчи ерге ес болмакъ Къумукътюз ва Мычы­гъыш Республика учун уллу сююнч тюгюлмю дагъы?! Майса Агьматованы бажарывлу ёлбашчылыгъы булан маданият уьйню яратывчу коллективи этеген берекетли иш оьрде эсгерилген гьаракатлар булан дазуланмай. Оланы берекетли ишге къурулгъан гёнгю дагъы да артыкъ натижалагъа умут этдире…


Ишде етишген уьстюнлюклери саялы Майса Агьматовна баракалла, районну даражасында гьюрметлев грамоталар ва савгъатлар булан кёп керенлер савгъатлангъандан къайры, маданият ва билим берив министерликлени грамоталары булан да бир нече керен савгъатлангъан. Артдагъы вакъти етишген уьстюнлюклери саялы Майса Агьматовна Мычыгъыш парламентни хас саламат савгъаты – «Газель» машин булан да шабагьатлангъан. Биз ону шо саламат савгъаты булан гьакъ юрекден къутлайбыз, ишинде дагъы да уллу уьстюнлюклер, савлукъ ва яшав онгайлыкълар ёрайбыз!

Абас Мамаев.

Мычыгъыш Республика,

Борагъан.

Суратда: М. Бабутаева Мычыгъыш Республиканы Президенти Р. Къадыров булан.

(«Газель» машин

тапшурулгъан сонг).

Авторизация
*
*
Регистрация
*
*
*
Согласны с условиями сайта?
Генерация пароля