Лилия Жамалутдинова: «Музей театрны тарихин, оьсюв ёлун гёрсете»


Пятница, 08.06.2018г. - "ЁЛДАШ".


Май айны ахырында Татарстанны тахшагьары Къазанда «Театр музейи – гьалиги маданият яшавда» деген темагъа гёре 5-нчи Бютюнроссия семинар оьтгерилген. Шонда Магьачкъалада ерлешген театрланы тарихини музейини ёлбашчысы Лилия Жамалутдинова да ортакъчылыкъ этген. Ону булангъы гиччирек баянлыкъны сизин тергевюгюзге беребиз.


 


–Лилия Гьасановна, семинар нечик оьтдю, не масъалалар гётерилди?



–Арагъа салынгъан масъа­лалар гьазиринде чечилмей, заманны талап этеген масъалалар эди. Бу проектни, Россияны театр музейлерин оьсдюрювню гёз алгъа тутуп, А.Бахрушинни атындагъы баш музей Россияны маданият министерлигини якълаву да булан къургъан. Сонг да, гелеген 2019-нчу йылны РФ-ни Президенти В.Путин Театрны йылы деп негьакъ белгилемеген. Семинаргъа ёлбашчылыкъ буса, А .Бахрушинни атындагъы баш театр музейни директору Дмитрий Родионов этди ва семинар къурумлу кюйде оьтдю. Шонда салынгъан масъалалар шу темалагъа гёре болду ва док­ладлар охулду: «Театр музейлери – Интернетде. Компьютер программаланы замангъа гёре къурув ва оьсдюрюв», «Выставкалар къурмакъ учун практика гьаракатлар», «Театр музейлеринде экспозициялар къурувну масъалалары», «Милли маданиятны халкъгъа малим этивде ва оьсдюрювде театр музейлени агьамиятлыгъы», «Театр ва музей. Жанлы тарих» деген ва оьзге темалар семинарны ортакъчыларына пайдалы болду.


–Уллу оьлчевдеги булай семинарны оьтгермек учун Къазан шагьар нечик сайлангъан?



– Шо негьакъ тюгюл. Москвада оьтгерилген алдагъы семинарларда Къазан шагьарны театр чалышывчулары бек актив кюйде ортакъчылыкъ этди. Янгы проектлерини гьакъында айтып, сынавун малим этип, театр яшавунда гьар тюрлю янгылыкъланы яшавгъа чыгъарма болагъанны гёрсетип, кёплени гьайран къалдырды. Шону учун да бу гезик семинар Къазан шагьарда оьтгерилди. Оьзю де бек гёзел шагьар. Гьар театрны тамашагъа къалардай оьзюню музейи бар. Театр­ланы директорлары музейлени ёлбашчылары булан тыгъыс байлавлукълар юрюте.


– Сиз семинарны ортакъчыларын бизин республиканы музейи булан да таныш этгенсиздир…



–Герти, мени сёйлевюм Дагъыстанны театрларыны тарихини музейинде юрюлеген чаралагъа багъышланды. Магъа айтма да, гёрсетме де бай материал бар эди. Бизин телерадиокомитетлерибизни каналларыны къуллукъчуларына айрыча баракалламны айтма сюемен. Бизин выставкаларыбыздан олар берилишлер этген эди. Семинарда шоланы бирлерин гёрсетдик ва кёплер яхшы багьа бердилер. Айрокъда Дагъыстанны театр художниклерини ва Людмила Ибрагьимованы театр романына багъышлангъан, олай да оьзге проектлени онда бек арив гёрдю ва яхшы багьалады.


–Къазан шагьарны музейлери, театрлары булан, шагьар булан таныш болгъансыздыр…



–Озокъда. Айтма бир гёзеллик! Сёз булан англатма къыйын, гёз булан гёрмесе пайда ёкъ. В.И.Качаловну атындагъы Академия орус драма театр булан таныш болдукъ. Савлай Россияда бырынгъы театрланы бириси, 1791-нчи йыл къурулгъан. Россияны ва Татарстанны халкъ артисти Александр Славутский булангъы ёлугъувубуз да бек таъсирли болду. Театрны музейине салынгъан экспонатлагъа къарап гьайран болдукъ. Бир минг квадрат метрны елейген уьч уллу зал тамаша эскпонатлардан толгъан.     



Сонг да, «Экият» деген яшлар учунгъу пачалыкъ къурчакъ театрыны ичине гиргенде, яшланы тюгюл, уллуланы да тамашагъа къалдырардай гьайранлыкъ бар эди. Шонча да уста кюйде безендирилген. Карим Тинчуринни атындагъы драманы ва комедияны театрында да болдукъ. «Дюньяны бары да шагьарларындан гёзел» деген Шаляпин Къазан шагьаргъа. Гертилей де, Къазан шагьар театрлар, музейлер булан бай ва гёзел. Музейлер буса театрны тарихин ва оьсюв ёлун гёрсете.


–Къысгъаракъ буса да, баянлыкъ бергенигиз учун баракалла.



–Сиз де савболугъуз.



Авторизация
*
*
Регистрация
*
*
*
Согласны с условиями сайта?
Генерация пароля