Борчларындан баш къачырмай


Понедельник, 18.06.2018г. — «ЁЛДАШ».


Бабаюрт районну юрт хозяйство тармагъыны тенгсиз байлыгъы – топуракъ. Районну хозяйстволарыны артсыз-алсыз будайлыкълары, гюнге бет буруп оьсеген гюлайланлыкълары, минг гектарлар булан чалтик чеклери, озокъда, кёплени эсинде. Лап да яхшысы, тарихибизде болгъан алмашынывлагъа да къарамай, районну сабанчылары топуракъгъа бакъгъан якъдагъы гьайын чы алышдырмадылар. Бугюн де бичен чалагъанлар да, будай орагъанлар да, чалтик къайтарагъанлар да бар.


 


Дагьнили топурагъыбызны Дзержинскийни атындагъы баш сугъарыв татавул районну топуракъларын сув булан таъмин де эте. Сувчулукъ касбу да оьзюню тарыкълыгъын тас этмеген. Мен оьзюню гьакъында язмагъа сюеген адилянгыюртлу сувчу, Дзержинскийни атындагъы сугъарыв системаны Адил Янгыюртдагъы бёлюгюню ёлбашчысы Бозигит Исавов оьзюню савлай яшавун шо касбу булан байлагъан.



Бозигит Исавов 1952-нчи йылда районну лап уллу юртларыны бири Адил Янгыюртда тувгъан. Чагъы етгенде, ол юртдагъы орта школагъа бара. Оьзюню тенглилери булан билим берив ожагъыны эшиклерин ача, яхшы къыйматлар булан школаны тамамлай. 1971-1973-нчю йыллар Совет асгерде оьзюню ватандаш борчун уьстюнлю кюйде кюте.



Сув – дюньяны берекети. Сув болмаса, дюньяда яшав да болмай. Шогъар байлавлу болуп буса да ярай, къумукъларда сувгъа байлавлу кёп санавда айтывлар да бар, аталар сёзлери де. Шону яхшы билеген Бозигит Исавов, асгерден къайтгъан сонг, кёп ойлашмай, Магьачкъаладагъы сувчуланы гьазирлейген техникумгъа тюше. Техникумда ол оьзю юртда алгъан билимлерин артдыра, сувчулукъ касбуну кюрчюсюне тюшюне.



– Мен сувчу болма яшдан тутуп да муштарлы эдим, – деп хабарлай Бозигит Исавов. – Юртлу яшланы яшаву о заманларда сув булан ты­гъыс байлавлу эди. Бавгъа, бахчагъа сув салмагъа къайсыбыз сюймегенбиз? Юрт ягъадан оьтеген ва Терик оьзенни булгъанчыкъ сувларын районну лап да йыракъ юртларына ерли етишдиреген Дзержинскийни атындагъы татавулда яшлыгъыбыз гетген деп айтса да ялгъан болмас.



1976-нчы йылда Бозигит Исавов, оьрде эсгерилген техникумну уьс­тюнлю кюйде битдирип, ата юртуна къайта. Шо йылларда районну алгъа гетген юрт хозяйство тармагъына янгы билимлени, янгы адамланы гючю тарыкълы бола ва шо йыл ол райондагъы Дзержинскийни атындагъы сугъарыв системаны проект бёлюгюнде баш техник гьисапда загьмат ёлун башлай.



Янгы ишге гиришген Бозигит Исавов техникумда алгъан билимлерин яшавгъа чыгъармагъа гьаракат этип чалыша, оьзюн яхшы яндан танытмагъа къасткъыла. Ишин сюегенлик ва не ишни де башына алмагъа къоркъмайгъанлыкъ булан ёлбашчыларыны янындан макътав къазана. Арадан кёп де гетмей, ону Адил Янгыюртдагъы 2 номерли бёлюкню инженери этип белгилей ва 1980-нчи йылдан бугюнге ерли шо участкада загьмат тёге.





– Мен – сувчуман, – дей Бозигит Исавов. – Савлай оьмюрюмню ­дюньягъа яшав береген сув булан байлагъаныма гьёкюнчлю де тюгюлмен. Сугъарыв системада мен ишлейген 42 йылны боюнда яшавлар хыйлы башгъа болду, нечесе гьакимлер алышынды. Амма сув буса бугюн де тарыкъ. Сув – даимлик ниъмат! Сувсуз гюнню бизге Яратгъаныбыз гёрсетме де гёрсетмесин.



Дагъыстанны сугъарыв тарма­гъыны оьсювюне этген къошумун, загьматда етишген уьстюнлюклери саялы Бозигит Исавов гьар тюрлю йылларда Дзержинскийни атындагъы сугъарыв системаны гьюрметлев грамоталары, районну ва республиканы башын тутгъанланы баракалла кагъызларын алгъан. 1990-нчы йылда буса ол Дагъыстанны Оьр Советини Гьюрметлев грамотасы булан да савгъатлана.



2007-нчи йылны къышында Бозигит Исавов Россия Федерацияны юрт хозяйство министерлигини Гьюрметлев грамотасы булан да савгъатлана ва шо йыл огъар «Загьматны ветераны» деген белги де бериле.



Ишден баш къачырмайгъан, не тапшурувну да намуслу кюйде кютеген Бозигит Исавов оьзюню иш ёлдашларыны янындан алгъан гьюрмет – ону учун лап да уллу савгъат. Ол шону булан оьктем де бола, оланы алдында оьзюню борчларын да унутмай.



– Мен бёлюкню ёлбашчысы болуп ишлейгенли 26 йыл бола, – дей Бозигит Исавов. – Шо йылланы боюнда юрт ва район яшавда хыйлы алышынывлар болду. Амма мен ким булан да къыйышып ишлемеге къасткъыламан. Юртну ёлбашчыларыны янындан да кёмек табаман. Бизин гьар гюнлюк ишибизде юрт гьакимлер де ортакъчылыкъ эте ва арагъа чыгъагъан четимликлени бирче чечмеге гьаракат этебиз.



Бозигит Исавовну сёзлерине гёре, ону ишинде иш ёлдашларыны сынаву ва билими хыйлы кёмек эте. Неге тюгюл де, сув булан оюн болмайгъанны олар да яхшы билелер ва оьзлени алдына салынгъан борч­лагъа мекенли кюйде янашмагъа къаст этелер.



Бозигит Исавов уьлгюлю ата да дюр. Ол оьзюню агьлюсю Гьава булан эки уланны ва эки къызны оьсдюрген, яхшы мердешлерде тарбиялагъан ва олагъа оьр билимлер берген. Авлетлери де яшавда гьариси оьз сокъмагъын тапгъанлар. Ишден къайтгъанда, Бозигит Исавов авлетлерини авлетлеринден сююнюп, олар булан иш къавшалтгъан къаркъарасына яллыкъ таба…



Авторизация
*
*
Регистрация
*
*
*
Согласны с условиями сайта?
Генерация пароля