Юзюмчюлени иши къыйматланды


Къаягент районда юзюмчюлюк – аслу тармакъ. Яхшы тюшюм оьсдюрмек учун, юзюмчюлер сав йылны боюнда юзюм бавларда тер тёгюп ишлейлер. 2017-2018-нчи йылларда да олар гьаракатын сёндюрмеди.

 




«Къаягент» деген пачалыкъ унитар предприятие районда уллу ва кёп тармакълы   хозяйстволаны бириси гьисаплана. Мундагъы юзюм бавлар 481 гектарда ерлешген. Шоланы
348 гектары толу тюшюм бере. 133 гектары
– яш юзюмлюклер. Йылны башында юзюмчюлер бавланы дагъы да 18 гектаргъа артдыргъан.





Сонг да, мунда топуракълар бош къалмасын учун, 300 гектардан артыкъ ерлер дыгъарлагъа гёре юртлулагъа берилген. Оланы барысында да юртлулар оьз харжын чыгъарып юзюм бавлар этген ва оьр тюшюм алмакъ умутлар булан гьаракат этип ишлейлер.



Бавларда татли емишни гьар тюрлю журалары бар. «Ркацители» «Левокумское» жураларындан аслу гьалда ичкилер гьазирлене. «Молдова», «Августин» журалары Россияны кёбюсю шагьарларына сатывгъа йибериле.



Бавланы гьалын билмек, юзюмчюлени ишине къыймат бермек муратда 1-нчи августда предприятиени баш агроному Илмутдин Шихалиев, бригадирлери, Дагъыстанны юрт хозяйство ва сурсат министерлигини вакили Магьамматрасул Абдуллаев булан бирге «Къаратегенек», «Денгиз бой», «Алхожагент тюз» деген участкаларда болдулар, юзюм бавланы ичиндеги гьалын ахтардылар.



Тергевчюлени айтывуна гёре, бавларда оьтгерилген ишлени гьалы, сан яны рази къалардай. Оланы къыйматлавуна гёре, гьар гектардан орта гьисапда аслам татли емиш къаравуллана.





– Бу йыл исси ва янгурсуз йыл болду, – дей ГУП-ну баш агроному Илмутдин Шихалиев. – Шогъар да къарамай, бизин ишчилерибиз,механизаторларыбыз, бригадирлерибиз сав йылны узагъында юзюмлюклерде гележек тюшюмню мугькам кюрчюсюн салмакъ муратда кёп гьаракат этип ишледилер. Натижада культивация этилди, зараллы жанлагъа, аврувлагъа къаршы агъулу дарманлар берилди, байлав ва оьзге ишлер белгиленген болжалларда ва сан яны булан оьтгерилди.



Белгили болгъаны йимик, сугъарыв юзюмлюклерден алынагъан тюшюмню къадарын яхшы артдыра. Баш агрономну айтывуна гёре, «Къаягент» деген пачалыкъ унитар предприятиеде сугъарыв сувлар етишмейгенлик себеп болуп, гьар йыл четимликлер тувулуна. Бу йылда да хозяйст­вону «Къаратегенек» участкасында 126 гектардагъы юзюмлюклер сугъарылмай къалгъан.



Тергевлер тамамлангъан сонг, ону ортакъчылары баш агрономну кабинетинде гьасиллер чыгъармагъа жыйылдылар. Шондан пайдаланып, биз Дагъыстанны юрт хозяйство ва ашамлыкъ министерлигини вакили Магьамматрасул Абдуллаев булан лакъыр этдик.



– Бары да участкаларда болуп, юзюм бавланы гьалын гёрген сонг, ойларыбызны аян этмеге де енгил. Гёргенибизге разибиз, – дей Магьамматрасул Абдуллаев. Ишлер сан яны булан кютюлген, яхшы тюшюмге мугькам кюрчю де салынгъан.



Бир айны ичинде тюшюмню къайтарыв кампания башланажакъ. Оьсдюрюлген татли емишни гьар бюртюгюн тас этмей жыймагъа тарыкъ болажакъ. Шону учун бары гюч: адамлар, техника гьазир болмагъа герек.



Тергевню натижаларын чыгъарывда болгъан сёйлевлени жамын чыгъара туруп, «Къаягент» пачалыкъ унитар предприятиени директору Магьамматшакир Алибеков юзюмчюлюкдеги ишчилеге, механизаторлагъа, оланы бригадирлерине яхшы иши учун баракалла билдирди. Юрт хозяйство ва ашамлыкъ министерлигини вакили Магьамматрасул Абдуллаевге буса жаваплы ишде ортакъчылыкъ этгени саялы рази­лигин англатды, татли емишлени жыйыв кампания тас этивсюз оьтгерилежегин эсгерди.



Авторизация
*
*
Регистрация
*
*
*
Согласны с условиями сайта?
Генерация пароля