Яшланы иржайывун гёрмек–уллу насип

Савлай яшавун яшлагъа багъышламакъ учун, янгыз оьз касбусун билегенлик таманлыкъ этмей. Оьзюню уьстюне аврувуна кант этип гелген гиччи аврувланы педиатры сюйкюмлю иржайыву булан къаршыламагъа герек бола. Ондагъы чыдамлыкъ, ишине берилгенлик, яшланы гьар ёнкюсюн бар кюйде къабул этивден кёп зат гьасил бола.


Бабаюрт район больницада узакъ йылланы боюнда загьмат тёгеген Къураш Ярашович Жумакъазиев де– шо якъдан бай сынавлу врач. Ону кабинетини алдында гьаман да адам бола, гьарисини–оьз авруву, оьз талабы. Чинкдеси, оланы ол оьзюню сюйкюмлю иржайыву булан къабул эте ва авруву булан гелген яшлагъа сююнч бере.


Къураш Жумакъазиев 1972-нчи йылда Тамазатёбе юртда танывлу ва абурлу Яраш ва Чубарзат Жумакъазиевлени агьлюсюнде тувгъан. Къурашны атасы Яраш Жумакъазиев – яш наслуну ат къазангъан насигьатчысы, загьматны ветераны. Ол узакъ йыллар ата юртундагъы орта школаны директору болуп ишлеген, кёп яшланы шагьра ёлгъа узатгъан. Билимге муштарлыкъ да Къурашгъа атасындан гелгенге шеклик де ёкъ.


Школада охуйгъан йылларында да Къураш оьзюню тенглилерини арасында билимге къастлыгъы булан тергевню тартгъан. Яхшы къыйматлар булан ата юртундагъы орта школаны битип, Къураш 1988-нчи йылда Дагъыстан пачалыкъ медицина институтуну педиатрия факультетине охумагъа тюше.


–Балики, мен доктор касбуну сайлагъаныма анамны таъсири болгъандыр,–деп хабарлай Къураш Жумакъазиев. – Анам Чубарзат 35 йылланы боюнда Тамазатёбе юртдагъы участка больницада аначы болуп ишледи. Ишин де сюе эди, яшланы да. Шо вакътилерде яшлар кёп оьлегенге гёре, янгы тувгъан яшлагъа къарав етишсин учун, анам оланы уьйде де сакълайгъан гезиклер бола эди. Шолайлыкъда, мени «агъаларым» ва «инилерим» кёп бар. Олар булан буссагьатда да аралыкъ юрютемен.


Гьасили, оьзю кёп сююп танглагъан касбугъа теренден тюшюнмек учун, Къураш савлай гюнлени китаплар булан йибере. Ону къастлыгъын дарс береген муаллимлер де гёре ва огъар гьар якъдан кёмек этмеге къасткъылалар. Яхшы къыйматлар булан мединститутну 1994-нчю йылда тамамлап, ол Къызлар шагьардагъы интернатурада охувун давамлай.


1995-нчи йылдан тутуп Къураш Жумакъазиев район больницада загьмат ёлун башлай. Арадан кёп де гетмей, ол район больницаны яшлар бёлюгюню заведующийи, шону булан бирге баш врачны орунбасарыны борчларын да кюте.


–Яшланы аврувларын багъа туруп, яшавну лап да сююнчлю ери яшланы бетиндеги иржайыв экенге мюкюр болгъанман,–деп хабарлай Къураш Жумакъазиев. – Авруп гелген яш бизин алдыбыздан сав-саламат чыкъса, шондан уллу не насип болма бола?!


Къураш Жумакъазиев – сынавлу педиатр. Ол больницада ишлейген 23 йылны боюнда топлагъан бары да сынавун ва билимин яшланы сав этивге бакъдыргъан. Бёлюкню ёлбашчысы гьисапда да ол оьзюню иш ёлдашларыны атына исси сёзлени къызгъанмай.


–Мени онг янымда гьаман да мени иш ёлдашларым табыла,–дей ол, мени булангъы лакъырын узата туруп. – Бёлюкде тазалыкъны болдурагъан къуллукъчулардан башлап, медсестралагъа ерли бары да оьз ишине жаваплы янашалар. Яшланы савлугъуну гьайын этивде айсенилик болмагъа тюшмей. Шону олар яхшы англайлар.


Къураш Жумакъазиевни къайратлы загьматы белгисиз къалмай. Савлукъ сакълавда етишген уьстюнлюклери саялы гетген 2017-нчи йылда ол Россияны савлукъ сакълав министерлигини баракалла кагъызы булан савгъатлангъан. Ону учун лап да уллу савгъат буса – ол сав этген яшланы аналарыны баракалласы ва алгъышлары.


Къураш Жумакъазиев татывлу агьлюню башы да дюр. Ол агьлюсю Нюргьат булан уьч къызны оьсдюрелер. Уллу къызы Узлипат бугюнлерде атасы йимик Дагъыстан медакадемияны тамамлап, Аштархан шагьарда больницада педиатр болуп ишлей. Экинчи къызы Женнет – медакадемияны 5-нчи курсуну студенткасы. Гиччиси буса – башлапгъы класланы охувчу къызы.

Авторизация
*
*
Регистрация
*
*
*
Согласны с условиями сайта?
Генерация пароля