Къумукъну дюньясын уяндыргъан «Ёлдаш»


  


«Ёлдаш» газетни бу номери ону 100-йыллыкъ юбилейине багъышлана.



Гертиден де, оьтген 100 йыл – халкъыбызны яшавунда гьар не якъдан да оьтесиз агьамиятлы ва уллу агьвалат.



Газетни биринчи номери 1917-нчи йылгъы инкъылапны девюрюнде, апрель айны биринчи гюнлеринде басмадан чыгъа башлагъан. Билесиз, о девюрню айтылгъан шаири Айбала Дадав язгъан кюйде, «инкъылап ярыкъ къошгъан юлдузлагъа-айлагъа», Зайналабит Батырмурзаев буса: «Тувду Чолпан. Танг билинди!» – деп бютюн юхулу махлукъну уяндырма къарагъан.



Инкъылап халкъыбызны уяндыргъан. Дагъыстан пачалыгъыбызны ва милли газетибизни кюрчюлендиргенлер, «ал байрагъын» оьрлендиргенлер шо байракъ миллетибизни сыйындан тюшмежегине гьакъ гертиден инана болгъанлар. Дюр. О байракъ энни де миллетибизни къолунда елпиллей ва елпиллежек.



Озокъда, юбилейлер янгыз той этип къуванмакъ учун оьтгерилмей, алынгъан ёлланы ва оьтген йылланы ахтарып, дарс алып, гележек язланы, алынажакъ янгы ёлланы белгилемек, гьакъылланы янгыртмакъ учун оьтгериле.



Биз, газетни чалышывчулары, газетни мухбирлери, чыгъарывчулары ва сиз, ону охувчулары, бу гьакъда ойлашмай тюгюлбюз. Ойлашабыз, озокъда. Къаст да къылабыз, гьаракат да этебиз. Олар берекетсиз тюгюлдюр, тек къыйматлайгъан охувчулар экенни де англайбыз.



Бу номерни материалларында да оьтген девюрлерден гьасил чыгъарып, гележегибизни англатма чалышабыз.



Билебиз, алышынгъан заманлагъа гёре янгы пикир, янгы ойлар яратып болмайгъан миллет гележекдеги дюнья ярышларында ер къазанып болажакъ миллет болуп болмай.



Дагъыстан пачалыгъыбызны ва газетибизни кюрчюлендиргенлер оьзлени заманында шону яхшы англай болгъанлар ва шо англавланы оьзлерден сонггъулагъа да сингдирме нечакъы да къаст этген. Олар болагъанын этгенден къайры, бирлер иш саялы жанларын да къурбан этгенлер. Болагъанны этмек – бизге де сыйлы борч.



Бу газет халкъны газети, ону баш газети. О тап 1917-нчи йылдан берли хакъыбызны сапар ёлдашы, ойчусу болуп, ону уяв сакълай геле. Тюнегюнден бугюнге ва тангалагъа – «Ёлдаш»!



Аявлу ёлдашлар, газетибизни биринчи юз йылы къутлу болсун!!! Ва гьаракатгъа – берекет!




Камил АЛИЕВ.

Авторизация
*
*
Регистрация
*
*
*
Согласны с условиями сайта?
Генерация пароля