Топуракъ онда къыйын тёгегенленики болма герек

 

Пятница, 13.04.2018г. — «ЁЛДАШ».


Топуракъ ва топуракъ участкаланы масъаласы кёп йылланы боюнда чечилмей тургъан. Гьюсемегентлилер ишлетеген топуракълар Дагъыстанны Гьукуматыны Председателини заместители, топуракъгъа ва мал-матагьгъа къарайгъан министр Екатерина Толстикованы, Къаягент район администрацияны ва Гьюсемегент юрт администрацияны ортакъчылыгъы булан арагъа салынып ойлашылды.


 


Юрт ерлерде яшайгъанланы кёплерини масъалалары – оьзлер ишлетеген топуракъгъа ихтияры ёкълукъда. Тувулунгъан масъала кёп йылланы боюнда топуракъ аралыкъланы жыйылгъан масъаласы ва юрт ерлерде яшайгъан загьматчылагъа топуракъны ишлетме имканлыкъ берив булан байлавлу.



Ёлугъувну вакътисинде Екатерина Толстикова булай деген: «Мен ойлай­гъан кюйде, топуракъда ишлейгенлени якълама герекбиз. Шолай тапшурувну бизге Дагъыстан Республиканы Башчысыны борчларын заманлыкъгъа кютеген Владимир Васильев берген. Сизин масъаланы Дагъыстан Республиканы Гьукуматыны Председатели Артём Здуновгъа етишдирежекмен.


 Ондан сонг да, ювукъ арада болажакъ координация генгешге оланы пикрусун билмек учун республика прокуратураны вакиллерин чакъыражакъбыз. Бир предприятиени тергемекни гёз алгъа тутарбыз. Министерликге ГУП-ланы директорлары булан дыгъарлар байламакъны, олай да эки де якъны ихтиярлары ва борчлары гьакъында англатыв иш юрютербиз. Кёбюсю гезиклерде ГУП-ланы ёлбашчылары адамлагъа этген иши саялы гьакъ тёлеме герек.



Бизин пикрубузну сиз англасын учун айтаман, гьали юрюлеген лакъыр ГУП-ланы топуракълары «Гьюсемегент» юрт советге берилсин деп юрюлмей. Мунда лакъыр о ерлени юрт советге бермек, сонгунда шо топуракъларда загьмат тёгегенлеге берилсин учун юрюле».



Екатерина Толстикова айтгъан кюйде, законда башгъачалай язылмагъан буса, топуракъ ону ишлетегенленики болма тарыкъ.


 

 


Бизин мухбирибиз.



Авторизация
*
*
Регистрация
*
*
*
Согласны с условиями сайта?
Генерация пароля