Россияны пачалыкъ байрамы


Пятница, 08.06.2018г. - "ЁЛДАШ".


Россияны харлысызлыгъыны гюню 1990-нчы йыл 12-нчи июнда биринчи съездде РСФСР-ни халкъ депутатлары къабул этген гюн болуп токътай. Шо документ РСФСР-ни Конституциясы ва законлары СССР-никилерден оьрде болма герек деп токъташдыргъан. Съезд 1991-нчи йылны 25-нчи майында чыкъгъан къарары булан 12-нчи июнну ишлемейген гюн этген. 1992-нчи йылдан башлап буса, Россия Федерацияны Оьр Советини къарары булан шо гюн байрам тарх гьисапда къоллана.


 


1994-нчю йыл 2-нчи июнда Россияны Президентини указы булан 12-нчи июн РФ-ни пачалыкъ байрамы бола. 2002-нчи йыл болгъунча уьлкени ватандашлары шо гюнню Россияны пачалыкъ харлысызлыгъыны Декларациясын къабул этген гюн гьисапда белгилеп турду. 2002-нчи йылда гючге Загьмат кодекс гирген сонг, байрам гюнге «Россияны гюню» деп айтылып башланды.



Россияны гюню патриот ругьлу байрам гьисапда юрюле. Байрам бирлешивге ва парахатлыкъгъа чакъыра. 12-нчи июнда орамланы пачалыкъ байракълар безендире. Бары да шагьарларда ва юртларда шо гюн байрам агьвалатлар оьтгериле. Уллулагъа ва яшлагъа шатлыкъ программалар онгарыла. Халкъ ва саният ярмакюлери оьтгериле. Ахшам белгили йыравланы ва чебер иш гёреген коллективлени концертлери бола. Ондан сонг кёкге фейерверклер уча.



Дагъыстанда да шолай чаралар оьтгериле. Тахшагьарны ер-еринде милли байрамлар бола. Гьар миллетни хас ашлары этиле. Концерт программалар бола. Милли тиллерде йырлар йырлана. Ахшам, адатлы кюйде, Магьачкъаланы уллу майданында бирлешген концерт программа оьтгериле. Онда халкъ булан бирликде Дагъыстан Рес­публиканы ёлбашчылары ортакъчылыкъ эте.



 


Бизин мухбирибиз.



Авторизация
*
*
Регистрация
*
*
*
Согласны с условиями сайта?
Генерация пароля