Ишигиз шатлыкъ, сююнч гелтирсин!


Гьар йыл сентябр айны 27-синде яшланы тарбиялавчуларыны ва яшлар бавларда чалышагъан бары да къуллукъчуланы гюню оьтгериле. Оьзлени байрам гюнюнде де яшланы тарбиялавчулары ишин яшлар булан оьтгере. Шо гюн де бизин яшларыбызны тарбиялавну гьайында чалыша.



Эгер де Россияда яшлар бавларыны тарихине тергев этсек, биринчи яшлар баву 1872-нчи йылда Тула шагьарда ачылгъан. Бир йылдан буса яшлар баву Санкт-Петербург шагьарда ишлеме башлагъан. Сонггъа таба яшлар бавлары Россияны бары да шагьарларында ачылгъан. Яшланы тарбиялавчуланы гюню буса 2004-нчю йылда биринчилей белгиленген.



Ата-аналар, юртларда яда шагьарларда болсун, не гьаракат этип де гиччипавларын яшлар бавуна тарбиялама йибермеге къаст эте. Озокъда, ата-аналаны кёплери сав гюн ишде бола. Яшлар бавуна юрюйген яшлар буса школа чагъына етишгинче кёп затгъа уьйрене, яшлар бавларыны тарбиялав программасына гёре тарбиялавчулар къалам тутма, сурат этме, шиърулар охума, йырлама ва яш оьсе туруп билмеге герекли кёп мердешлеге уьйрете. Шо саялы гиччипавланы оьсювюнде яшланы тарбиялавчуларыны къыйматлы агьамияты бар.



Гиччипавланы кёплерини яшлыгъыны биринчи абатлары, гьар тюрлю оюнлары, гиччирек уьс­тюнлюклери яшлар бавларындан башлана. Ата-аналар яшларын оьз­лер ишдеги вакътисинде сав гюнге яшлар бавларындагъы тарбиялавчулагъа аманат эте. Ата-анасындан эсе яшлар булан тарбиялавчулар кёп заманын йибере, олар булан къатнай. Уьйде ата-анасы берген тарбия, къарав йимик, яшлар бавларында да гиччипавлар оьзлени тенглилери булан гьаллашып, ярашып, бири-бирине ёл къоймагъа, бирче ойнамагъа, ашамагъа уьйрене. Тарбиялавчу яшлагъа тюз кюйде янашып, олар булан гьаллашып, ёнкю яшланы гьарисини юрегине ёл табып ишлеп билмеге герек. Шолай тарбиялавчулагъа не йимик макътавлар, яхшылыкълар, байрамлар этсе де кёп тюгюл.



Яшланы тарбиялавчуларыны гьар гюнюню маънасы ва агьамиятлыгъы да арта. Оланы шо гюн ял алмагъа ишинден азат этмесе де, яшлар бавларында олагъа багъышлап гиччипавланы да къуршап шатлы байрамлар оьтгерегени де мердешге айлангъан.



Гиччипавлар тарбиялавчуларына, яшлар бавларыны бары да къуллукъчуларына багъышлангъан шиърулар охуй, йырлар йырлай, гьар тюрлю гёрсетивлер оьтгере. Олагъа гьар тюрлю етген уьстюнлюклери саялы грамоталар, баракалла кагъызлар тапшурула.



Яшлар бавларыны бары да къуллукъчуларын касбу байрам гюню булан гьакъ юрекден къутлайбыз! Яшлар булангъы гьар гюнлюк ишигиз сизге янгыз шатлыкъ, сююнч гелтирсин! Савлугъугъуз артсын!



Авторизация
*
*
Регистрация
*
*
*
Согласны с условиями сайта?
Генерация пароля