Яшёрюмлени къурумуна – 100 йыл


Октябрни 29-нда республиканы кёбюсю шагьарларында ва районларында йимик Янгы Къаягентдеги Россияны халкъларыны мердешленген маданият центрында комсомолну 100 йыллыгъына багъышлангъан уллу жыйын оьтгерилди.



Шатлыкъ чарагъа гелгенлени арасында комсомолну Къаягент район къурумуну 70-80-нчи йыллардагъы активистлери, район комитетини кёбюсю Биринчи секретарлары бар эди. Залгъа жыйылгъанланы алдында шоланы бириси Умар Умаров доклад этди.



Терен маъналы докладында Умар Умаров районда комсомолну биринчи къурумлары юрютген ишлер, 1935-нчи йылны июль айыны 2-нде оьтгерилген 1-нчи район конференциясыны гьакъында тындырыкълы хабарлады. Ол айта­гъан кюйде, уьлкебизде ва Дагъыстанда болгъан алмашынывлар Къаягент якълагъа да тез етише болгъан.



Янгы къурулгъан Къаягент районну комсомол къурумуну конференциясында район комитетини 1-нчи секретары этилип Семён Насимов сайлангъан. Конференцияда эсги адатлагъа къаршы чыгъып сёйлевюнде гьапкъайгентли къыз Идей Къадиева башындагъы чуткъусун чечип ташлагъан ва шолай этмеге оьзге къызъяшланы да чакъыргъан. Экономиканы, билим алывну ва билим беривню, маданиятны даражасын гётеривде комсомол къурумну членлери ва олагъа къарап яшёрюмлер уллу къошумун этгенлер.



Уллу Ватан дав башлангъанда комсомол яшёрюмлени кёплери гёнгюллю кюйде давгъа гетген. Шоланы арасында комсомолну район комитетини 1-нчи секретары Муслим Элдерханов да болгъан. Давдан къайтмагъа кёплеге насип болмагъан. 1004 адам дав майданларда жан берген. Къайтгъанлар парахат яшавну къурмагъа, юрт хозяйство тармакъны гётеривге гиришген. Давну актив ортакъчылары Али Адавов, Исрапил Алиев, Умар Агъаев районну комсомол къурумларыны башын тутуп чалышгъан.



70-нчи йылларда комсомолну сыдыраларындагъы яшлар ва къызлар районда юрт хозяйство тармакъны оьсдюрювде уллу къошум этген. Етишген уьстюнлюк­лери саялы «Каспий» совхозну комсомол къуруму ВЛКСМ-ни ЦК-сыны эсделик вымпели булан савгъатлангъан, комсомолну комитетини секретары Юсуп Юсупов ВЛКСМ-ни 18-нчи съездини делегаты этилип сайлангъан, совхозну бригадири Абдулкъадыр Къадыров ВЛКСМ-ни ЦК-сыны премиясыны лауреаты болгъан. Шолай уьстюнлюклеге оьзлеге Илмутдин Шихалиев, Сулейманпаша Магьамматов, Муталим Къазбеков, Шапи Гьюсейнов, Магьамматшарип Гьасайниев башчылыкъ этеген комсомол яшёрюмлени юзюмчюлюк бригадалары, савунчулар Залигьа Магьамматова, Патимат Магьамматова, къызардашлар Патимат ва Айшат Алимовалар, механизатор къызлар Зугьра Шагьбанова, Байрамкъыз Лачинова, Марият ва Патимат Камиловалар, Амина Тапуева, Шугьайдат Дайитова етишмеге бажаргъан.



Жыйында чыгъып сёйлевлени вакътисинде Къаягент районну комсомол къурумларыны загьматдагъы, охувдагъы, маданиятдагъы, спортдагъы асил ишлери, етишген гёрмекли уьстюнлюклери гьакъында кёп исси сёзлер айтылды.



Авторизация
*
*
Регистрация
*
*
*
Согласны с условиями сайта?
Генерация пароля