Ярмакюде къумукъ китаплар


Уьч гюнню узагъында, сентябр айны 20-сындан 22-сине ерли, Дагъыстан милли китапханада 7-нчи керен «Таргъу-тав» деген кёп адамланы ортакъчылыгъы булан китап ярмакю оьтгерилди. Ону ортакъчылары ва гёрме гелегенлер Дагъыстанда ва оьзге ерлерде чыкъгъан китапланы гёрме бола эди.



Ярмакюдеги китапланы арасында бизин къаравубузну къумукъ халкъны тарихине, маданиятына ва олай да башгъа тармакъларына багъышлангъанлары тартды. Яшлагъа багъышлангъан ва олагъа охув учун тарыкълы болагъан мердешлени арасында биз А.С. Пушкинни къумукъ тилге гёчюрюлюп де чыгъа­рылгъан «Балыкъчыны ва балыкъны гьакъындагъы ёммагъы» деген ва Анвар Гьажиевни «Авузгъа бош акъ бабиш» деген китаплары бизин тергевюбюзню тартды.



Уллу охувчулагъа багъышлангъан китапланы арасында Йырчы Къазакъны асарлары гирген китабын ва «Къумукъ халкъ авуз яратывчулугъу» деген илму-ахтарывну айрыча эсгерме тюше.



Ярмакюде белгили алим ва Дагъыс­тан оьлчевде къумукъ тилде чыгъарылагъан «Ёлдаш» газетни баш редактору Камил Алиевни уьч китабы да бар эди. Шоланы экиси – «Кумыки с древнейших времен до наших дней: хронограф» ва «История кумыков» – къумукъланы тарихине багъышлангъан. Уьчюнчю китап буса – «Тайны кумыкской топонимики: этюды о географических названиях» – топуракъда къумукъ халкъны тарихини бетлери къойгъан маълуматланы гечив ёлунда язылгъан.



Бизин тилевюбюзге гёре ярмакюню оьтгерегенлер шо эсгерилген китапланы бир ерге жыйып, оланы суратын алма имканлыкъ этди.



Мавлетхан Муцалханов.

Суратда: ярмакюде къумукъланы гьакъындагъы


китапланы бирлери.



Авторизация
*
*
Регистрация
*
*
*
Согласны с условиями сайта?
Генерация пароля