Анвар Сайитовну сурат выставкасы


Тамаша тюслени ва сигьрулу гьызланы таъсири булан художник яратагъан чебер асарланы халкъ арадагъы умпагьатлыгъы толу кюйде ачылмагъан буса да ярай. О бек тарыкълы яратывчулукъ болса да, жамият арагъа онча да мекенли сингип битмеген. Балики, оьзюню гьайранлыгъын англайгъанлар аз экени саялыдыр.



Гертиден де, бир-бир художниклени яратывчулукъ асарларын гьазирине англасанг да, бирлериникине къарагъанда, ол не айтма сюйгенни ойлаша къаласан. Анвар Сайитовну асарлары къаравчугъа художник не айтма сюегенин туврадан исбатлай. Тамгъа илинген «Яшав мюгьлетлеге» илиякълы гьислер булан чакъыра ва оьзюнгню де шо мюгьлетлени гесеги болмагъа гьасирет эте.


Сентябр айны 12-синде Магьачкъаланы тарихи музе­йиндеги выставка художникни 80 йыллыгъына багъышлангъан. Ол яшавдан гетсе де, сурат асарлары булан халкъ арада яшай. Бу выставкагъа къарагъанда, ол савлай республикагъа, адам арада болмаса да, яратывчулукъ ёлунда гьисап береген йимик гёрюне.



Выставка Магьачкъала шагьар администрацияны ва Патимат Гьамзатованы атындагъы Дагъыстан чебер музейни сиптечилиги булан оьтгериле. Музейни директору Зарема Дадаева эсгерген кюйде, Анвар Сайитовну яратывчулукъ дюньясы оьтесиз назик ва бай.



Магьачкъала шагьар администрациясыны башчысыны заместители Запир Алхасов да айтгъанлай, Анвар Сайитовну яратывчулу­гъунда тахшагьарны келпети аслу ер тута. Гьар суратына къарасанг, ол, художник, Магьачкъаланы нечик бек сюегенин англайсан. Сайитовну яратывчулугъу булан таныш болгъан адамгъа ол гьар этеген суратына уллу сююв булан янашагъанын да билмеге къыйын тюгюл. Шо сююв ону гьар заман ишлеме чакъыра болгъанына инанасан.



Анвар Сайитов оьзбашына чалышагъан художник эди. Выставкадагъы суратларыны бирлери 1970-нчи йылда этилген. Ону яратывчулугъуна бары да къаравчулар, художниклер, инчесаниятны ахтарывчулар бир йимик янашмай. Ону гюржю художник Пиросмани булан да тенг­лешдире. Пиросмани дюньягъа аты айтылгъан художник болса да, хас чебер билими болмагъан. Шону учун да суратлары гиччи яшлар этген суратлагъа ошай. Анвар Сайитов да шолай. Ону яратывчулукъ ишлерине тергевлю къарасанг, авторну юрегини тазалыгъына инанасан. Уллу адам болса да, эки янындагъы негер де яш йимик таза сюювю булан янашгъанын эс этесен.



Выставкада гёрсетилген ишлер: пейзаж, портрет, натюрморт. анималистика ва тарихи композициялар художникни терен пагьмусу болгъан экенине бирдагъы керен инандыра.




Максим Эсенбиев.

Авторизация
*
*
Регистрация
*
*
*
Согласны с условиями сайта?
Генерация пароля