Оьтген жума Къарабудагъгент юртда Ана тиллени халкъара гюнюне багъышлангъан таъсирли жыйын оьтгерилди. Газетни «Времена» бёлюгюнде маълумат да берилди. Тек ер аз гёрсетилген саялы, бары затны къуршап язмагъа болмадым. Бугюн «Яшланы дюньясында» онда ортакъчылыкъ этген яшёрюмлени ва гиччипавланы айрыча эсгерме сюемен. Жыйында ортакъчылыкъ этген алимлерибиз, язывчуларыбыз эсгергенге гёре де, Къарабудагъгент районну муаллимлери ва оланы башын тутгъанлар да ана тилибизге айрыча тергев этелер. Паравул, Дёргели, Къарабудагъгент, Къакъашура юртлардан язагъан яшларыбыз буссагьатда да бар. Яшланы ана тилине муштарлыгъы, мангалайындан тер акъгъынча таъсирли тавуш булан чартлатып-чартлатып чебер къайдада охуйгъанындан гёрюне. Шу жыйында да гьар юртлардан гелген охувчу яшлар тергевюбюзню тартды. Яшланы арасында Уллубийавул орта школаны 11-нчи класыны охувчусу Къысгъа Къысгъаев Бадрутдин Магьамматовну «Мен къумукъман» деген шиърусун нече де арив чебер къайдада охуду. Ону тавушу булан чартлап-чартлап чыгъагъан Бадрутдин Магьамматов язгъан сатырлар, залда олтургъан къаравчулагъа хозгъавлукъ салды ва бираз талчыкъдырды. Олай да, гимназия школаны гиччипаву Арсанбек Канзитдинов Агьмат Жачаевни шиърусун бек арив охуду. Сонг да Барият Тавлуева, Зайира Тагьибова гьалиги жагьил шаирлерибизни шиъруларын охудулар.
Оьрде айтып гетген охувчу яшланы бугюн айрыча эсгерегеним, оланы уьстюнде ишлейген бары да муаллимлеге баракалламны билдирмеге сюемен. Бизин бары да белгили алимлерибиз булай уллу жыйынларда гьар заман эсгерелер:
– Ана тилибизни гележеги башлап ата-анадан гьасил. Демек, уьйде де, яшлар бавунда да олар нечик тарбияланса, школада гележек охув яшаву да шондан гьасил бола, – деп. Гертиден де, дурус чу. Ата-ана уьйде авлетлерин нечик тарбияласа, охув ожакъларда да шо тарбия булан гетежек. Биз барыбыз да билебиз, муаллимлени иши рагьат тюгюл ва олар тёгеген къыйынгъа гёре гьеч артыкъ алапа гёрсетилмей. Шо саялы аналар да яшланы уьстюнде муаллимлер булан бирге ишлесе, мен оьрде эсгерген яшлар йимик пагьмулулар кёп болур.
Аявлу аналар, муаллимлер ва къызардашлар, Яратгъаным сизин савлугъугъузну артдырсын. Барыгъызны да артдагъы айланы ичинде оьтгерилген бары да байрамлар булан къутламагъа сюемен. Шулай бизин къуршайгъан жыйынлар ва бизин шат этген, къувандырагъан гиччипавлар кёп болсун. Ачыкъ ана тилибиз бар болсун ва бай болсун! Етип гелген 8 март байрам булан да аналаны ва мауллимлени гьакъ юрекден къутлай туруп, алгъышлар этемен. Язбашдай яшнагъыз ва яйнагъыз!
