Дагъыстанда артдагъы йыллар къыш айларда да чакъ исси бола. Шону бир яны яхшы буса, къоркъунчлугъу да бар. Адамлар тазалыкъ болдурмакъ учун къуругъан отланы, япыракъланы, къуругъан бутакъланы ягъа яда рагьатланма деп агъач бойлагъа бара. Шолай гезиклерде ягъылгъан от уллу зарал гелтиреген оьртен болуп токътай.
Бу жуманы башында Хасавюрт бойдагъы орманлыкъ хозяйстволарыны гезикли генгешинде агъачлыкъланы от тюшювден сакълав масъалалагъа къаралды. Жыйынны ача туруп, Хасавюрт орманлыкъ хозяйствону ёлбашчысы Марат Ахаев жыйылгъанланы Дагъыстанны Гьукуматыны янгы къарары булан таныш этди ва 1-нчи мартдан тутуп, сакълыкъ болдурувгъа аслу тергев берме чакъырды.
Жыйынгъа чакъырылгъан Хасавюрт районну юрт хозяйство управлениесини директору Идрис Загьалов, алгъасавлу чараланы бёлюгюню ёлбашчысы ва къуллукъчусу Алик Вагьабов, Абдулнасир Тавбиев, от тюшювге къаршы 10 номерли бёлюкню ёлбашчысы Ренат Ибрагьимов ва Эндирей, Тотурбийкъала, Могилёвское, Покровское, Къандавуравул ва Борагъангечив юртланы башчылары оьзлени янындан юрюлюп турагъан ишлени гьакъында айтдылар.
–Кёбюсю гезиклерде агъачлыкълагъа хозяйстволар авлакъ бойлардагъы къавданлагъа от салынгъанда от тюше, – дей Марат Ахаев. – Шону учун хозяйстволаны башчылары, юрт башчылар жумамежитлерде англатыв иш юрютме герек. Бугюнлерде Лаваша ва Гуниб районланы боюндагъы от тюшювню натижасында кёп ерге зарал болгъан.
Шолай да, бизден ижарагъа ерлер алып ишлетегенлеге де янгыдан билдирме тюше. Неге тюгюл гьали, чачывланы башында от ягъагъан гезиклер кёп бола. Эгер де биз барыбыз да сакълыкъ болдурсакъ, агъачлыкъларыбызны аман сакълама бажаражакъбыз.
Сёз ёругъуна гёре айтсакъ, Хасавюрт орманлыкъ хозяйствогъа гиреген агъачлыкъланы майданы 30 минг гектардан да артыкъ. Шогъар Хасавюрт, Къызылюрт, Къазбек ва Бабаюрт районлар гире. Шонча ерге 32 адам къарама герек. Олар ишин тындырыкълы юрютсе де, шо бойларда яшайгъан яда гелип ял алма сюеген адамлагъа отдан сакъ болуп айланма герек. Башгъача болса, «табиатны оьпкелери» деп гьисапланагъан агъачлыкълар шайлыгъа кемимек бар.
