Оьтген итнигюн, август айны 5-нде, Къарабудагъгент районну орта билим береген охув ожакъларын сан янлы билимлеге ес болуп, оьр къыйматлагъа тамамлагъан уланлагъа ва къызлагъа медаллар тапшурувгъа байлавлу шатлыкъ гьаракаты оьтгерилди. Эсгерилген муниципал къурулувуну администрациясыны жыйынлар юрюлеген уллу залында юрюлген шо гьаракатда гьакимликни ерли къурумларыны жаваплы къуллукъчулары, школаланы директорлары, муаллимлер, охувчулар ва оланы ата-аналары ортакъчылыкъ этди.
Къарабудагъгент районну билим берив управлениесини начальниги Тажли Хизриева охувчуланы билим алывда етишген уьстюнлюклери булан гьакъ юрекден къутлай туруп, оланы атына лайыкълы сёзлер айтды. Охувда йимик, яшавда да гёз алгъа тутгъан бары да асил муратларына етишип, олагъа оьрлюкден-оьрлюкге абат ала къалмакъны ёрады.
Къарабудагъгент районну гьакимбашыны заместители Жалалутдин Жама—лутдинов да шо гюнгю къутлавлагъа къошулду. Инг алда ол бу йыл охув ожакъланы оьр къыйматлагъа битдиргенлеге «Охувда етишген айрыча оьрлюклери учун» деген медалланы тапшурду. Шону булан бирге, Бютюнроссия олимпиадаларда уьст болгъанлагъа, маданият ва спорт гьаракатларда жагьлыкъ гёрсетгенлеге Гьюрметлев грамоталар берди. Сонг да, оьзюню гезигинде тизив билимлеге ес болгъан уланлар ва къызлар оьр охув ожакъланы тамамлап чыгъып, англавлу касбучулар болуп гене де ата юртуна къайтып, элине, халкъына пайдалы болар йимик иш гёрме башлажагъына инанагъанын ташдырды.
Яшлар да, оланы ата-анасы да билим алма имканлыкълар яратылгъаны учун гьакимиятгъа, билим берив управлениеге, оьзлеге гьайлы янашгъан муаллимлеге баракалла билдирдилер. Эсделик сурат алдырып битгенден сонг да яшлар яйылып битмей шайлы заман турду.
Шо гьакъда айта туруп, Къарабудагъгент районну юртларында иш гёреген охув ожакъланы бу йыл алтын медалгъа битдиргенлер 22 барын айрыча эсгермеге тюше. Гюмюш медаллагъа 11-нчи класны битдирип чыгъагъанланы 13-сю лайыкълы болду.
Б. БАЙБОЛАТОВ.
