Ойлашмагъа зат бар…

Коррупция… Коррупциягъа къаршы ябушувну Россияны Президенти Владимир Путин уьлкебизни аманлыкъ сакълав къурумларыны алдына салынгъан борчланы аслусу деп билдирген. Амма иш ишге тюшгенде, шо бизде эки де аягъына акъсайгъаны, чинкдеси, жамиятыбызны ичинден ашап турагъан, оьзюнден бизин сав этмеге гереклер оьзлер авруйгъаны эслене.


Россияда коррупциягъа къаршы закон чыгъарылгъанлы да аз болмай. Эгер законну къоллап йиберсе, урушбат берген де, алгъан да, оланы экисини де арачысы болгъан да такъсырланмагъа тюше. Бизде буса шо чаралар да бир якъгъа ишлейген йимик гёрюне. Неге тюгюл де, коррупциягъа къаршы ябушувну таягъы башлап гелип амалсызланы башына тие.


Шо гьакъда айта туруп, оьрде эсгерип гетген закон къабул этилгенде, масхара-иришхат гьисапда бютюндюнья торунда ­яйылгъан музыкалы гёрюнюш эсиме гелип гетди. Онда коррупциягъа лап да кёп муаллимлер ва докторлар байлангъанны айтып йырлай эди. Озокъда, йырда оланы тыш пачалыкълардагъы уьйлери, денгизлерде юзеген багьалы гемелери эсгерилген. Кюлесенг де ярай, тек ойлашмагъа да кёп зат бар. Гетген жума телевизорда эсгерилген кюйде, Россияда токъташгъан урушбатчылыкъны орта багьасы 500 минг манатдан да оьтген ва шексиз шо акъча муаллимлени ва докторланы кисесине гирмейгени англашыла.  


Эленген унну къайтарып элеген учун, унгъа да, унну элейгенге де гелеген зат ёкъ. Коррупция да, элене туруп, дагъы элемеге ери къалмагъан. Коррупциягъа къаршы юрюлеген «давну» гьакъында гьар гюн дегенлей телевизордан да эшитебиз, газетлерде охуйбуз, мухбир гьисапда оьзюбюз де язабыз. Гьасили, къолубузгъа тутгъан «элекден» оьзюбюз де талгъанбыз. Амма коррупция булан машгъул тайпалар буса, кюйге къарагъанда, талмагъанлар. Олар не законну, не де оьзлеге къаршы билдирилген «давну» пешеме де пешемейлер. Уьстевюне, оьзлени халкъгъа этеген таъсирин де артдыралар.


Бал тутгъан бармагъын ялар дей къумукълар. Мен мунда савлай Россиягъа белгили болгъан оборона къалмагъалланы «игити» Васильеваны ва ону «гьюнерлиги» булан Россияны бюджетинден, урлангъан миллионланы эсгерме де эсгермеймен. Лап да кюлкюлю ери буса – такъсырлавдан ол бир жумадан азат этилгенлик. Кисенгде миллионларынг бар буса, сагъа бир суд да, бир туснакъ да бир зат да тюгюлю ону мисалында ачыкъ гёрюндю.


Артдагъы айлар бизин республикада да урушбатчылыкъгъа къаршы чаралар гёрюлюп тура. Уллу ёлларда бир нече машин гьайдавчулар ёл юрюш низамны сакълайгъанлагъа урушбат берме къарагъан саялы тутулгъанны айтып билдиривлер де чыкъды. Амма шо урушбатны машин гьайдавчулар сююне туруп бермейгенни ёлда гьар гюн юрюйген мен оьзюм де билемен, мисаллар гелтирип де боламан.


Къуллукъларым болуп бир гюн Хасавюртгъа бармагъа деп ёлгъа чыкъдым. Эртен эрте вакъти эди. Хасавюртгъа гиреген ердеги постда мени токътатды. Документлеримни тергеди, ичгенимни-ичмегенимни сорады, гьасили, оьзлер булан постну ичине гирмекни талап этдилер. Мен де, тынглавлу ватандаш гьисапда, оланы арты булан юрюймен. Ичинде къайтарып дагъы да соравлар бере, аптечкамны, от тюшювде къоллайгъан алатланы, не башынгны аврутайым, тарыкъны да, тюгюлню де сорайлар. Сайки, менден «манчы» сюегени оланы сёйлевюнден де билинип тура. Мен де пысаман. Артда бириси «манчыгъа» 50 манат сама да бер деп тиледи. Бермесем амалым бармы?! Бердим – гетдим. Олай мисаллар бир булан да, янгыз мени булан да битмейгенни эшитип де билемен.


Оьрдеги мисалны гелтиргеним, тиленчилени ерин бийлеп алгъан йимик айланагъан «гаишниклер» мени де законну бузмагъа борчлу этгенни айтмагъа сюемен. Сонг мунда кимни айыпламагъа герек? Нете, амалсыз халкъ оьзюню къыйынлы гюнюне жыйгъан ахырынчы кепеклерин урушбатчылагъа сююне туруп береми? Озокъда, бермей. Кёплер шо береген акъчаны гьалал да этмейлер. Олар законну янындан якълав тапмайгъангъа гёре, законсуз ишлени этмеге борчлу болалар. Халкъны законсуз ёлгъа буса инг башлап законну якъламагъа гереклер сала.


Озокъда, мен коррупцияны гьакъында яза туруп, артдагъы жума Россияны бир-бир шагьарларында коррупциягъа къаршы юрюлген митинглени яны болуп язмайман. Денгизде юзеген бузтавну тюбю йимик, шо митинглени де халкъгъа гёрюнмейген ерлери кёп бар. Амма шо митинглерден сонг урушбатчылыкъ янчгъан ва амалсыз ерге чыгъарып турагъан халкъны сесин оьрде токътагъан гьакимлер эшитсе чи яхшы болажакъ эди. Неге тюгюл де, пачалыкъ къуллукъланы башын тутгъанлар намуслу кюйде ишлемесе, урушбатгъа къаршы юрюлеген «давну» таягъы амалсыз халкъны башына тиегенлик дагъы да уза
тылажакъ.

Авторизация
*
*
Регистрация
*
*
*
Согласны с условиями сайта?
Генерация пароля