Дербент районда Тажикистанны дёрт ватандашына байлавлу гьукму чыгъарылгъан.
Ахтарывчулар токъташдыргъан маълуматлагъа гёре, тыш пачалыкъны дёрт къатынгиши вакили 2022-нчи йылда жинаятчы гюп къургъан. Тиленчилер болуп, адамланы хантавлугъундан пайдаланып, уьйлеринден акъча ва багьалы затланы урлай болгъан.
Избербашда ерли къатынгишини 200 минг манатгъа токътайгъан алтынларын урлагъан. Дербент районну Геджух юртундагъы къатынны буса 400 минг манатын урлама бажаргъан. Шолай, Буйнакск районну Атланавул юртунда уьй есилени бирисини 61 минг манатын алып гетгенлер.
Суд жинаятчыланы гьарисин 2 йылгъа эркинликден магьрюм этмек деген къарарны чыгъаргъан. Ондан къайры, олагъа урлангъан чакъы акъчаны есилерине толу кюйде къайтармагъа тюшежек.
Туснакъ болжалы битгенде Тажикистанны ватандашларын къаравулну тюбюнде ватанына бакъдыражакъ.
Алав Алиев.
