Янгы 2019 йыл – Театрны йылы

 

Хамисгюн, декабр айны 13-нде, Магьачкъалада, ДР-ни маданият министерлигинде жыйын болду. Онда Дагъыстандагъы бары да театрланы директорлары, прес-къуллукъларыны ёлбашчылары, маданият тармакъны ат къазангъан къуллукъчулары, театр чалышывчулар ортакъчылыкъ этди. Маданият министр Зарема Бутаева жыйынны ачды ва юрютдю.

 Ол айтгъан кюйде, Россияны Президенти Владимир Путинни Указына гёре гелеген 2019-нчу йыл Театрны йылы деп белгиленген. Декабрни он уьчюнде Театрны йылыны ачылывуна байлавлу гьаракат Россияны маданият министри Мединскийни ортакъчылыгъы да булан Ярославль шагьарда оьтгерилген.



Театрны йылыны ачылывуна байлавлу шо гюн Дагъыстанда да кёп тюрлю гьаракатлар юрюле. Театр тармагъына уллу къошум этген, тек арабызда ёкъ аты айтылгъан актёрланы эсге алыв, «Эсибизде. Сюебиз» деген чараны оьтгере туруп, республиканы шагьарларында ва юрт школаларда театрны йылына багъышланып акъ шарлар учурув, «Театральный автобус» деп театр тармагъыны ветеранларын миндирип Магьачкъалада ва Дербентде экскурсиялар оьтгерив, «Театральная ночь» деп шо гюн республиканы бары да театрлары къаравчулары учун ахшам сагьат бешде тегин спектакллер гёрсетив болажакъ.



Театрны йылына багъышлангъан гьаракатланы эсгерген сонг министр 2019-нчу йыл оьтгерме гёз алгъа тутулгъан проектлени гьакъында да айтды. Гелеген йыл май айны 26-сындан июнну 1-и болгъанча Магьачкъалада уллу оьлчевде фестиваль оьтгерме гёз алгъа тутулгъан. Сиптечилери болуп маданият министерлик, республиканы къурчакъ театры ва маданият департаменти, фестиваль Магьачкъала шагьар администрацияны, РФ-ни ва ДР-ни театр чалышывчуларыны союзуну, ДР-ни яшёрюмлер ва туризм министерликлерини якълаву булан оьтгерилежек.



Бу проектни оьлчевюнде Бразилияны, Россияны, Индияны, Китайны ва Гюнтувуш-Африканы къурчакъ театрлары спектакллер гёрсетежек. Гёрмекли деп гьисапланагъан бу фестивальгъа Россияны атындан янгыз Дагъыстан Республиканы къурчакъ театры баражакъ. Шо да – театрны коллективи учун, ону чебер ёлбашчысы, РФ-ни инчесаниятыны ат къазангъан чалышывчусу Аминат Ягьияева учун уллу уьстюнлюк ва ­оьрлюк.



Бу фестиваль оьтгерилеген вакътини ичинде экономика форум да оьтгерме гёз алгъа тутулгъан. Онда спонсорлукъ кёмек этивню, бизнесни, рагьмулукъ ишлени юрютювню масъалалары арагъа салынажакъ ва маданият тармакъны оьсювюне, экономика аралыкълагъа болушлукъ этежек деген умутлар бар.



Гелеген йыл Дагъыстанда оьтгерилежек бирдагъы уллу гьаракат–халкъара театр форуму. Гёз алгъа тутулгъан кюйде, шо форум гелеген йылны октябр-ноябр айларында оьтгерилежек. Ону аслу мурады буса – яратывчулукъ байлавлукъланы беклешдирмек, гьар тюрлю пачалыкъланы ортакъчылыгъы булан маданиятланы байындырмакъ, театр чалышывчуланы арасында яратывчулукъ ва касбу байлавлукъланы болдурмакъ. Форумда ортакъчылыкъ этмек учун Россияны, СНГ-ни ва тыш пачалыкъланы гёрмекли, белгили театр чалышывчулары чакъырылажакъ. Форумну вакътисинде спектакллер гёрсетилгенден къайры, «дёгерек столлар», мастер-класлар, пикру алышдырывлар юрюлежек.



Театрны йылында уллу оьлчевде бютюнроссия ва халкъара гьаракатлар оьтгермек де гёз алгъа тутулгъан. Шолар Бютюнроссия театр марафон, Театр олимпиада, «Золотая маска» деген 25-нчи фестиваль, Чеховну атындагъы 14-нчю халкъара театр фестивалы ва Россияны гиччи шагьарларыны театрларыны фес­тивалы гьисапда арагъа чыгъажакъ.



Дагъыстанны театрлары маданият министерликни якълаву булан бары да эсгерилген гьаракатларда актив кюйде ортакъчылыкъ этежек.



 

Авторизация
*
*
Регистрация
*
*
*
Согласны с условиями сайта?
Генерация пароля