Жыйым команда сююндюрмей

   


Пятница, з0.03.2018г. — «ЁЛДАШ».



Россияны жыйым командасыны эки тергев оюну саялы болгъан эки жумалыкъ танапус не къаравчуланы, не де футбол касбучуланы  айтардай сююндюрмеди. Москвада ва Санкт-Петербургда оьтген эки де оюнда бизин «айтылгъан» футболистлерибиз къуршалгъан жыйым команда къонакълардан алты топ «алып», оьзлер бир топ гийирди.


 


Тюзю, бизге къаршы ойнайгъан командалар дюнья оьлчевюнде де лап яхшы ойнайгъан командаланы сыдырасына гиреген айтылгъан Бразилияны ва Францияны жыйым командалары эди.  Тек шолай болса да, оьз майданында, оьзлени якълап стадионгъа гелген, телевизор къаравчуларыны алдында алты топну къапуларына гирмеге къоймагъа тюшмей эди.



Оьтгерилген шо эки де оюн жыйым командабызны бугюнгю гьалын, гючюн гёрсетди. Шу ерде гючсюзлюгюн деп айтсакъ, дагъы да дурус болур. Туврадан алып, яшырмайлы айтылса, бизин жыйым команда къонакъланы къырыйында бёрюню алдында токътагъан къозугъа ошай эди! Яхшы чы, тергев оюнлагъа очколар берилмей.


 Очколар бериле болгъан буса, олар бизинкилеге уьчер топ гийирип токътамажагъына мен бир де шеклик этмеймен. Тек нетежексен, бизин дагъы командабыз, уьлкени жыйым командасына къуршалгъанлардан къайры яхшы ойнамагъа, оюн юрюлеген майданда артыкъ бажарывлугъун гёрсетмеге болагъан футболистлерибиз де ёкъ. Оланы майкаларына бизин уьлкени аты язылгъан болгъан сонг, къаравчуланы шо жыйым командагъа юреги аврумаса амалы ёкъ.



Март айны 24-нде оьтгерилген биринчи оюнда бизинкилер Москвада Бразилияны жыйым командасын къабул этди. Къонакълар футбол майдангъа аслу составын да чыгъармай, дюньяда лап да багьа футболистлени бириси, Неймарны да составына къошмай оюнну башлады. Россияны жыйым командасыны баш тренери Черчесов буса майдангъа бугюнге лап гючлю составын чыгъарды.



Биринчи таймда бизинкилер усталыгъы, сынаву, къонакъланыкинден эсе кем буса да, олардан кёп чабып, кёп къасткъылып, айтардай гьаракат да этмейли, парахатына ойнайгъан бразилиялылардан оьзлени къапусуна гол йибермей къутулду. Мен ойлашагъан кюйде, танапусну вакътисинде бизин къонакълар оьзлени баш тренеринден «бир-экилени» алгъан болмагъа ярай.


 Шолай болмаса, биринчи тайм да, бизинкилени айтардай сан да этмей ойнайгъан бразилиялылар экинчи таймны шолай гючлю башламас эди. Бир-бир мюгьлетлерде чи бизинкилер олагъа къарап, оланы чалтлыгъына, усталыгъына эсер-месер болуп, къайда барагъанын, къайсылай чабагъанын, не этегенин билмей къала эди!



Оюнну 54-нчю минутунда Миранда, 64-нчю минутунда Котиньо, 68-нчи минутда Поулиньо бизинкилеге уьч гол да «юклеп», къайтып оьзлени парахат оюнуна къайтды. Къонакъланы баш тренери де парахат болуп, артгъа салгъан оюнчуланы янында да къаравчу йимик футболгъа къарап олтурду. Озокъда, ону командасы чы 14 минутну ичинде тыш майданда .бек къыйналмайлы есилени къапуларына уьч гол гийирди. Бир де шеклик этмеймен, олар эгер тарыкъ болгъан буса, дагъы да гол гийирип болажакъ эди. Шо буса олагъа бирдокъда тарыкъ тюгюл эди.



Март айны 27-синде бизин жыйым команда экинчи оюнну Санкт- Петербург шагьарда Францияны жыйым командасын къабул этди. Къонакълар биринчи таймны 40-нчы минутунда россиялыланы къапусуна биринчи топну гийирсе де, бразилиялылар йимик гючлю гёрюнмей эди. Бизинкилер де аз буса да олагъа тирелди, гьатта чапгъынчыбыз Смолов бир къоркъунчлу мюгьлетни де къолдан чыгъарды. Тек не болса да, Францияны жыйым командасы бизинкилерден гючлю экени сав оюнну узагъында гьис этилип турду.



Экинчи тайм башланып, арадан 5 минут да гетмей, Пауль Погба, бизин якълавчуланы да алдатып, экинчи топну гийирди. Оюнну 69-нчу минутунда Смольников оьзюне берген топдан пайдаланып, Фёдор Смолов къонакъланы къапусуна гол гийирди. Шолай, оюнну санаву 1:2 болду. Оюн битмеге 20 минут къалды. 


Шо заман шу оюнну сама утдурмайлы, ничьягъа сама тамамламагъа гьаракат этме тарыкъ деп къаравчулар да, оьзлер футболистлер де ойлашмай къоймагъандыр. Тек, кюйге къарагъанда, оьзлеге гол гирмей туруп, франциялылар да бизин жыйым команда булан бары гючюн салып ойнамагъан болмагъа ярай. Оюнну 83-нчю минутунда биринчи таймда да Россияны жыйым командасына топ гийирген Мбаппе бирдагъы да топну бизин къапулагъа тюзледи. Шолай, оюн 1:3 санав булан битди.



Шолайлыкъда, дюньяны чемпионаты башлангъынча бизин командагъа да, ону баш тренери Черчесовгъа да хыйлы иш гёрмеге тюшежеги белгили болду.



Авторизация
*
*
Регистрация
*
*
*
Согласны с условиями сайта?
Генерация пароля