ЯНГУР ВА ЗАМАН БЕК ПУРШАВ ЭТДИ

Оюн москва заманы булан эртен сагьат онда башланды (Красноярскиде о заман 14 сагьат эди, Москва булан тенглешдиргенде – алты сагьат башгъалыкъ). Мен билегенли, гьали болгъанча «Анжини» хас оюну эртен сагьат онгъа бир де салынмагъан. Оюн башланып, арадан отуз минутлар оьтюп, футбол майдангъа кёк тешилгендей гючлю янгур явма башлады. Гьатта стадионну къалкъысыны тюбюнде ерлешген камералардан къайры, тюпде, футбол майданны дёрт де янында  ерлешген  камералар, оьзлени ишин юрютюп болмай, «Спорт» каналда юрюлеген тувра эфирдеги берилиш бираз замангъа токъталды. Бу шартлар Красноярскиге уьч очкону артындан гелген, ерли «Енисейни» составындан гючлю «Анжиге» нечакъы бола буса да пуршав этди.

«Анжи» оюнну тренировкада травма алгъан, команданы капитаны Расим Тагьирбековсуз башлады. Орта якълавчу Али Гьажибековгъа Расимни орнуна бразилиялы Эвертон жут болду. Экинчи таймда шу эки де эсгерилген футболистлени хатасындан, угловойдан сонг Кержаковну къапусуна гол да гирди.

Биринчи таймны буса бизинкилер оюнну оьзлени къолуна алып, кёп арив башлады. Оюн тамамлангъанча «Анжи» «оюнну югенлерин» оьзлени къолундан чыгъармады, тек бир гол гийирип де башына чыкъмады. Командалар ойнайгъан футбол майдан, айрокъда янгурдан сонг   батмакълыкъгъа бек ошай эди.

Биринчи тайм орталашып гелегенде, Илья Максимов, «Енисейни» якълавчусундан топну урлап, оланы къапучусу Плотников булан янгызгъа янгыз чыкъды, сонг къапучуну да алдатып, итти мююшден топну боп-бош къапулагъа бакъдырды. «Енисейни» къапуларына гирип барагъан топ, хапарсыздан бир холагъа урунуп, аутгъа гетди.

Экинчи таймда бизге «Енисейни» ярым якълавчусу Илья Гультяев гол гийирген сонг, «Анжи» оюн битип къалгъынча футбол майданны есилерин оьзлени къапуларына къысды, токътамайлы чапгъынлар этип турду.   Сердеров, Асилдаров, Максимов, Мутари, Чуперка, Алиев оьзлени мюгьлетлерин къолдан чыгъарды.

Бизин баш тренерибиз Сергей Ташуев оюн битгенде, команда неге утдургъаныны себеплерин санайгъанда, биз оьрде эсгерген янгурдан ва заманны маънисизлигинден къайры, бир нече футболистлени хаталарына да агьамият берди. Футболистлеге бек къарсалап сёйледи.

«Енисейни» баш тренери буса оюнну санавуна бек шатлыгъын яшырмай эди, футболистлерин макътады.

Шолайлыкъда, «Анжи» биринчи ерден бешинчи ерге тюшдю. Гелеген оюнну самаралы «Крылья Советов» булан бу айны йигирма дёртюнде «Анжи-Аренада» ойнайбыз. Самаралы футболистлени де алдына, бизинкилеге йимик, бу йыл премьер­-лигагъа къайтмакъ деген масъала салынгъан, команда он дёрт очко да къазанып, турнир таблицада уьчюнчю ерде ерлешген. Къаравчулар бек къужурлу оюн къаравуллай.

 

 

Шарапутдин КИШИЕВ.

Авторизация
*
*
Регистрация
*
*
*
Согласны с условиями сайта?
Генерация пароля