– Сайпулла, Стокгольм сизин нечик къаршылады?
– Стокгольм – бек парахат ва арив шагьар. 1998-нчи йылда шагьаргъа Европаны маданият центры деген ат негьакъ къоюлмагъан. Бизин де яхшы къаршыладылар. Аэропортдан тувра яшайгъан ерибизге етишдирдилер. Турушубузгъа сёз болмады. Тутушуп ябушувдан республиканы яшёрюмлерини жыйым командасыны баш тренери таргъулу Пахрутдин Залибеков, мен ва Ансар Шарипов бар эдик.
– Гьазирлигинг нечик эди? Мен билеген кюйде, ярышланы сизин авурлугъугъузда тогъатартгъан кочаплар ачды бугъай.
– Герти, тюз айтасыз. Ярышлар 19-нчу июльда башланды. Гьазирлигим яман тюгюл эди. Бу йыл мен кёп ярышларда ортакъчылыкъ этдим. Каспийскиде халкъара турнирде биринчи ер къазандым. Сонг Даъыстанда, бизин округда, Россияны чемпионатында экинчи ерлеге чыкъдым. Шоланы гьасиллери магъа Европаны чемпионатына ёл ачды. Бары зат яхшы эди. Тек бу йылгъы ярышлар алдагъы йыллардагъыларындан эсе гючлю эди десем, янгылыш болмасман деп эсиме геле. Себеби – бу ярышларда гьар авурлукъда гьар пачалыкъдан экевге ортакъчылыкъ этмеге ихтияр берилген эди. Шо да ярышланы къыставуллугъун гючлендирди.
– Халчагъа чыгъышларынг нечик болду?
– Башлап молдавиялы кочап Робу булан ёлукъдум. Ону 26 секунтдан 10 очко алып енгил утдум. Гюржюлю кочап Ж.Брегвадзе булангъы тутушув да шолай битди. Тюркиялы кочап Д.Къалайчы алдагъылардан бираз гючлю эди. Ол ярышларда уьчюнчю ерни къазангъаны сёзлеримни гертилей. Тек, ону да мен 16:6 санав булан утдум. Ярым финал дагъы да авур болду. Гюржюлю кочап Ж.Мамиури къатты яш эди. Не этип де, ону да 4:2 санав булан утмагъа болдум ва финалгъа чыкъдым. Финалда болгъан тутушувума рази тюгюлмен. Магъа къаршы чыкъгъан россиялы кочап Арслан Гаражиевни Россияны чемпионатында мен утгъан эдим. Бу гезик буса огъар утдурдум, экинчи ерге ес болдум. Уьстюнлюкню къолдан чыгъардым.
– Сизин школаны кочапларыны уьстюнлюклери яхшы белгили. Н. Исрапиловну, И. Бекболатовну атларын айтсакъ да таманлыкъ эте. Олардан сонг гелеген яшёрюмлер нечикдир?
– Натижалар яхшы. Дагъыстанда тутушуп ябушувдан Къаягент школа – уьчюнчю ерде. Бизден алда Хасавюрт ва Магьачкъала шагьарлар токътагъан. Оьтген йыл бизин школадан Жабрайыл Шапиев оьрюм яшланы арасында Европаны чемпиону болду. Ону иниси Ислам Жабрайылов Дагъыстанда, Гьамзат Дадаев мени булан бирге Каспийскиде юрюлген халкъара турнирде, Абдулкъадыр Дадашев Дагъыстанда студентлени арасында биринчи ерлени къазандылар. Бийсолтан Арсланов, Шапи Гьажиев, Магьамматмурат Абдуллаев де олардан артда къалмай. Гележекде биз эсгерилген яшёрюмлени уьстюнлюклери гьакъда дагъы да эшитежекбиз.
– Сизин бу ярышлагъа ким гьазирледи?
– Тутушуп ябушувну сырларына мени гиччиден берли Магьаммат Хасболатович Магьамматов уьйрете. Халчадагъы уьстюнлюклерим биринчилей ону булан байлавлу. Сонг магъа Нариман Исрапилов, Ильяс Бекболатов, Шихсайит Жалилов, Арслан Арсланов, республиканы яшёрюмлерини жыйым командасыны баш тренери Пахрутдин Залибеков яхшы кёмек этдилер. Олар булан бирге уьстюнлюкге етишивде къол узатгъан атам-анама, спортзалдагъы кёбюсю тенглилериме баракалла деп айтмагъа сюемен.
Сайпулла, бизде уьстюнлюк булан сизин къутлап къоймай, оланы барысын да къутлайбыз. Сизге буса гележекде янгы ва дагъы да уллу оьрлюклеге гётерилмеге савлукъ, усталыкъ ёрайбыз. Яшавда, спортда сизге бары да ёллар ачылсын. Умутларынгъа етгир.
Лакъырлашывну юрютген
Магьамматрасул ИБРАГЬИМОВ.
Къаягент район.
СУРАТДА: (солда) Сайпулла Алиболатов
