Тутушуп ябушувну халкъара устасы Милана Дадашева 48 кило авурлукъда биринчи ерге ес болгъан.

Мартны 10-дан 12-сине ерли Тюркияны Стамбул шагьарында белгили кочап, Олимпия оюнланы ва дюньяны чемпиону Яшар Догуну эсделигине багъышлангъан халкъара ярышлары оьтгерилди. Шонда къатынгишилени арасындагъы тогъатартывларда Къаягент районлу, буссагьат Магьачкъалада яшай­гъан къумукъ къыз, тутушуп ябушувну халкъара устасы Милана Дадашева 48 кило авурлукъда биринчи ерге ес болгъан.


Шо уьстюнлюкге ол башлап эки тюркиялы къызъяшны утуп ёл алгъан. Финалда Милана къазахстанлы кочап къыз Ирина Борисова булан ёлукъгъан ва эки минутдан ону сыртын халчагъа тийдирмеге бажаргъан.


Милананы ва ону тренери Светлана Грачёваны спорт яшавунда бу – бирдагъы бир уллу уьстюнлюгю. Биз оланы экевюн де, сонг да атасы Камилхан, анасы Лимунат Дадашевлени шо уьстюнлюк булан гьакъ юрекден къутлайбыз.


Ювукъ арада оьзлеге 23 йыл битмеген ва о оьмюрден айлангъан кочапланы арасында Европада алдынлыкъ алмакъ учун ярышлар къаравуллана. Бизин Милана Тюркиядагъы биринчи ерни алмакълыгъы булан шо ярышларда да ортакъчылыкъ этмеге имканлыкъ къазангъан.


Миланагъа ва ону тренери Светлана Грачёвагъа дюнья халчаларында 2017-нчи йылны боюнда янгы уьстюнлюклер ёрайбыз.

М. Ибрагьимов.


Къаягент район.


СУРАТДА: (арт сыдырада – солдан экинчиси) М. ДАДАШЕВА.


Авторизация
*
*
Регистрация
*
*
*
Согласны с условиями сайта?
Генерация пароля