Тутушуп ябушувдан Дагъыстанны чемпионаты

Инг енгил категорияда Бобохан Вагьитовгъа тенг гелеген кочап болмады. Уьч кругдан оьтюп, хасавюртлу кочап Микайыл Давутов булан ёлукъду ва ону ябушувну биринчи минутунда сыртын ерге тийдирди.

61 кило авурлукъда хасавюртлулар, гетген йыл чемпион болгъан Шамхал Хизриев ва 2013-нчю йылгъы континентара финалны ортакъчысы Шамил Омаров булан къаршылашды. Ш.Хизриев финалгъа чыкъгъынча алда дёрт ябушувда уьстюн гелди. Экинчиси буса оьзюню ябушувларыны уьчюсюн таза утду, къызгъын юрюлген финал ябушувну да Ш.Хизриев утду. 

Инг де гючлю кочаплар жыйылгъан 65 кило авурлукъда гетген йыл Ярыгинни турниринде биринчи болгъан Муршит Муталимов алдынлыкъны алды. Финал ябушувда ол хасавюртлу Абакар Абасгьажиевни  ябушувну болжалы битгинче утду.

97 кило авурлукъда Расул Магьамматов оьр канзиге  гётерилди. Огъар къаршылыкъ билдирип болажакъ Бадави Магьамматов, травма алып, ябушма чыкъмады. Оьзюн яхшы яндан гёрсетген къарабудагъгентли Абдулгьажи Таимов да шо себепден ябушма чыгъып болмады ва экинчи ерде къалды.

Экинчи гюн оьр канзиге гётерилген хасавюртлуланы ва магьачкъалалыланы арасына 74 кило авурлукъда къаягентли кочап Иса Шапиев къошулду. Ону уьстюнлюгю гёзленмеген эди. Неге десе, ол гьали болгъунча бир ярышларда да алдынлыкъны алмагъан. Финал ябушувда ол оьрюм яшланы арасында дюнья чемпионатда экинчи болгъан Магьаммат Иманшапиев булан ёлукъду. Финалгъа чыкъгъанча олар бирни йимик ябушувлар оьтгерди. Уьчер ябушувну болжалы битгинче утду. Финал ябушувда Иса Шапиев гючлю болуп чыкъды ва ябушувну 7:5 санав булан утду.

Къаягент учун бирдагъы-бир алтын медаль алмагъа 86 кило авурлукъда Даниял Маликовгъа имканлыкъ болду. Тек ол финал ябушувну хасавюртлу Агьмат Магьомаевге 2:5 санав булан утдурду.

70 кило авурлукъда хасавюртлу Магьаммат Хизриев ва инг де авур 105 килода Ислам Багьмуткъадиев биринчи болдулар.

Дагъыстанны чемпионатында 1–5-нчи ерлени алгъан кочаплар Темиркъазыкъ-Кавказ федерал округну чемпионатында ортакъчылыкъ этежеклер.

 

А. ГЬАМЗАЕВ.

Авторизация
*
*
Регистрация
*
*
*
Согласны с условиями сайта?
Генерация пароля