КУБОКНУ КЪАЗАНГЪАН

 

– Ярымфиналда Курск шагьарлы Богдан Краев булангъы ёлугъувда бираз къыйын болду. Ону утсам, финалгъа чыгъагъанымны биледим ва утма къаст этдим. Финалда да уьст гелип, гьюрметли кубокну къазандым, – деди Тулпар.

Тулпар – белгили яш боксёр. Ол Дагъыстанны уьч керен чемпиону. Гетген йыл Темиркъазыкъ-Кавказ федерал округну чемпионатында да биринчи ерни алма болду.

Тулпар бокс булан 10 йыл машгъул. Яхсайдагъы 1 номерли орта школаны битдирген. Къызлар шагьардагъы Али Алиевни атындагъы бокс академияны филиалына тренировкалагъа юрюй. Дагъыстан профессионал педагогика коллежни экинчи курсунда охуй.

Россияны кубогун утгъаны учун Тулпар Атаевге «Россияны спортуну устасы» деген ат да берилген. Яш боксёр учун бу – уллу уьстюнлюк. Тулпар шо ярышларда белгили боксёрланы утма болгъан.

– Тулпарны бу уллу уьстюнлюгюнден сююндюк ва арив къаршыладыкъ. Гележекде де огъар Европаны ва дюньяны чемпионатларында уьстюнлюклер ёрайбыз, – деди яхсайлы Камал Танбиев.

– Уллу гележеги бар боксёр деп айтма сюемен. Тулпар алдына салгъан муратлагъа етишме къаст эте. Етишежегине де инанаман, – деп къошду юртлусу Алибек Байсонгуров. – Тулпарны атасы Бадир де боксну кёп сюе. Тренер болуп ишлеп де турду.

– Тулпар Россияны кубогун утуп гелгенине бек сююндюм. Ювукъ арада ол Россияны жыйым командасы булан Ирландиягъа гетежек. Шонда Ирландия-Россия ёлугъув оьтгерилежек. Шо командалагъа Тулпарны къошгъангъа айрыча сююндюм, – деди атасы Бадир.

 

 

Измулла ГЬАЖИЕВ


Авторизация
*
*
Регистрация
*
*
*
Согласны с условиями сайта?
Генерация пароля