Хасавюртлулар – биринчилер


Ахырынчы гюн финал ёлу­гъувлар оьтгерилди. Оланы натижасында биринчи ерлени Хасав­юртда М. Батыровну атындагъы хас олимпия школагъа юрюйген спортчулар алды.


– Бизин тайбоксёрлар бары да авурлукъларда финалгъа чыгъып ябушдулар. Булай уллу уьстюнлюклеге бизин тайбоксёрлар биринчилей етишдилер. Шо бизин бек сююндюре. Бизин тренерлени къыйыны зая гетмеген. Шо ярышланы алдынлылары Темиркъазыкъ-Кавказ федерал округну чемпионатына Грозный шагьаргъа баражакълар, – деди спорт школаны тренери Магьамматрасул Алисолтанов.


– Дёрт тюрлю чагъындагъы яшланы ва уллуланы арасында кубокну ярышларын биз бир ерде оьтгерме токъташдыкъ. Ону маънасы да бар: уллуланы ва оьрюм яшланы арасында айры-айры ярышлар оьтгерме гьали бек къыйын. Шону учун шо ярышланы Хасавюртда юрютдюк.


Яшланы арасындагъы чемпион атгъа лайыкълы болгъанлар Грозный шагьарда оьтгерилежек Темиркъазыкъ-Кавказ федерал округну чемпионатына, уллуланы арасында кубокну утгъанлар Сочи шагьаргъа баражакълар, – деди ярышланы баш судьясы Магьаммат Багьандов.


– Оьтген ярышларда бизин Боташюртну яш тайбоксёрлары да оьзлени яхшы яндан гёрсетме болдулар. Шамил Османов (34 кило, 10-11 йыллыкъ), Исламдин Магьамматов (34 кило, 12-13 йыллыкъ), Гьасан Багьатов (42 кило), Марат Агьматханов (48 кило) биринчи ерлени къазандылар. Экинчи ерлени Жакъай Мамавов (44 кило), Гьюсен Багьатов (63, 5 кило) ва Алигьажи Мисиров (63, 5) алдылар. Элбрус Османов (54 кило) уьчюнчю ерге ес болду. Гьали округну чемпионатына гьазирлик гёрюп башлажакъбыз. Шонда да медаллар къазанма хыялыбыз бар, – деди Хасавюрт районда Али Порсукъовну атындагъы 1 номерли спорт школасыны тренери Надир Канаев.

Измулла ГЬАЖИЕВ.

Автор чыгъаргъан сурат.

Авторизация
*
*
Регистрация
*
*
*
Согласны с условиями сайта?
Генерация пароля