Ярышларда 10 къумукъ яш савгъатлагъа ес болду. Дагъыстанны чемпиону деген атгъа 77 кило авурлукъда хасавюртлу Мугьудин Къарагишиев, 94 килода бабаюртлу Гьайбулла Боявов, 85 килода бабаюртлу Айгъази Дибиров, 94 килодан оьрде бабаюртлу Элдар Гусев ва 56 килода хамаматюртлу Шарабдин Муратаев ес болдулар.
Ярышларда экинчи ерлени 56 килода адилянгыюртлу Идрис Ибрагьимов, 69 килода адилянгыюртлу Ильяс Ильясов алдылар. Хамаматюртлу Элдар Къамболатов 50 килода ва адилянгыюртлу Руслан Абакаров 56 килода уьчюнчю ерлени къазандылар.
–Мен авур атлетика булан машгъул болагъаным – дёртюнчю йыл. Шу ярышларда Дагъыстанны чемпиону деген атны биринчи керен къазандым. Шогъар бек сююндюм, –дей Хасавюртдагъы педагогика коллежни 4-нчю курсуну студенти Мугьудин Къарагишиев.
Хасавюртда Ш. Умахановну атындагъы хас спорт школаны тренери, къумукъ улан Сираждин Вагьабов бизге ярышлардан сонг булай деди:
– Оьтген ярышларда мен уьйретген экев биринчи ва бирев уьчюнчю ерлеге ес болдулар. Гьар авурлукъда Дагъыстанны чемпионлары болгъан атлетлер гелеген ай Старый Оскол шагьарда оьтгерилежек Россияны чемпионатында ортакъчылыкъ этежеклер. Шо ярышлагъа гьазирлик гёрювню уьч гюнден сонг башлайбыз. Россияны чемпионатында да савгъатлы ерлер къазанма хыялыбыз бар.
Ярышланы баш судьясы Олхозур Элмурзаев ярышланы натижаларын чыгъара туруп, ону сёзлерине булай къошду:
– Бабаюрт районну ва Хасавюрт шагьарны атлетлери ярышларда яхшы натижалар гёрсетдилер. Олар Россияны чемпионатында да шолай оьзлени гючюн гёрсетип болар деп умут этебиз. Чемпионланы ва савгъатлы ерлени къазангъан атлетлени тренерлери Сираждин Вагьабовну, Къазинбек Хасболатовну, Жанхуват Исламовну, Бийкълыч ва Рустам Бийболатовланы атларын айрыча эсгерме сюемен.
Измулла ГЬАЖИЕВ.
Суратда: М. Къарагишиев.
Автор чыгъаргъан суратлар.
