ГОЛЛАРСЫЗ – ДЁРТЮНЧЮ ОЮН

Оюнну 41- нчи минутунда Сардар Азмун, 79-нчу минутунда буса Гацкан «Анжини» къапучусу Беленовну къапусуна эки гол гийирип, уьч очко къазанды. «Анжи» буса  артдагъы вакътилерде оьзю оьтгереген дёртюнчю оюнунда бир гол да гийирип болмады.

Шо гьалны гьисапгъа алгъанда, команданы баш тренери Павел Врбагъа кёп суаллар тувулуна. Муна шо суалланы лап да аслулары. Неге футбол майданны онг янында ойнама тюшеген ярым якълавчу Обертан муна бу экинчи оюн орта чапгъынчыны еринде ойнай? Оьзю де къолайсыз ойнай. Неге команданы эки йыл тартып тургъан орта чапгъынчы Янник Боли сезонну башындан тутуп артгъа салгъан оюнчуланы скамейкасында мекенли кюйде бир ерге ес болуп тура? Неге чапгъынчыны къуллугъун кютюп болмайгъан Обертанны орнуна украиналы Будковский сама ойнамай?

Гелеген турда оьз майданыбызда ойналма тюшеген «Амкар» булангъы оюндан сонг болажакъ прес-конференцияда  шу суалланы «Анжи» команданы баш тренерине бермеге хыялым бар.
         Тюзю, «Ростов» булан команда яман да ойнамады. Тек дёрт оюнну ичинде нечакъы майданны есилерини къапусуну алдында къоркъунчлу мюгьлетлер тувдурмагъа  болса да,  бизин команда бир сама гол гийирмеге бажармады.  Алдан берли де шо къуллукъну кютюп гелген чапгъынчысыз голлар гийирме бек къыйын экенни футболдан аз англаву бар адам да  яхшы биле. Бизин команданы баш тренери П. Врба буса команданы артдагъы эки йылны узагъында лап да  гючлю чапгъынчылар гьисапда оьзлени гёрсетмеге бажаргъанланы артгъа салып, оюнчуланы скамейкасындан турма къоймай.  Команданы аслу составына чапгъынчы да тюгюл, къолайсыз да ойнайгъан Обертанны къоша.

Чемпионатны биринчи кругу битди. Команда оьз майданында бир оюнну тюгюл утуп болмады. Ахырынчы турларда бизин команда тувулунгъан гьалны алышдырмагъа болмажагъы ачыкъ кюйде гёрюне.

Гелеген оюнну бизин команда оьз майданында Гьажи Муслимович Гьажиев ёлбашчылыкъ этеген «Амкар» булан ойнажакъ.

 

Шарапутдин Кишиев.

Авторизация
*
*
Регистрация
*
*
*
Согласны с условиями сайта?
Генерация пароля