ГЕЗИКЛИ УЬСТЮНЛЮГЮ

– Алим, Бакю шагьардагъы турнирде уьст гелме къыйын болдуму?

 

– Финалда мен дюньяны чемпиону ерли улан Талегь Исаев булан ёлукъдум. Азербайжанлыны булай ярышларда яхшы сынаву барны мен алдан берли де биле эдим. Ол «уьюнде» утма сюегени де англашыла эди. Экинчи раундда мен къолуна авуртагъан приём этип ону утма болдум.

 

– Ерли спортчу булан тогъа тартма тынч болмайдыр?

 

– Озокъда тюгюл. Уллу залны ичинде къаравчулар бары да азербайжанлыгъа юрек тарта эдилер. Мени профессионал ябушувларда ортакъчылыкъ этегеним – алтынчы гезик. Оларда барында да уьст гелгенмен.

 

– Сен бугюн къайсы спорт клубгъа тренировкалагъа юрюйсен, тренеринг кимдир?

 

– Магьачкъаладагъы Жамал Къасумовну атындагъы спорт клубгъа юрюймен. Мени тренерим – Россияны ат къазангъан тренери Зайналбек Зайналбеков.

 

– Къошулчан ябушувларда нече минут, нече раунд ябуша?

 

– Бешер минут, эки раунд.

Кёбюсю гезиклер ёлугъувлар 1-2 минутдан битип къала. Аягъына ва къолуна авуртагъан ва бувагъан приёмлар этип утуп къоягъан гезиклер кёп бола.

 

– Панкратион ва микскомбат ябушувлардан да сен дюньяны чемпиону болгъансан. Россияда да биринчи ерни алдынг. Энни къайсы ябушувдан оьрлюк­лер къазанма хыялынг бар?

 

– Мен артдагъы йыл къошулчан ябушувдан (огъар ингилис тилде ММА деп айта) дюньяны ва Европаны чемпионатларында баш савгъатлар къазанма алгъа мурат салгъанман. Шону учун тренерим Зайналбек Зай­налбеков булан тренировкаларда кёп тер тёгебиз.

 

– Сагъа уьстюнлюклер ёрайбыз.

 

– Савболугъуз.

 

 

Измулла ГЬАЖИЕВ.

СУРАТДА: А. Черкесов.

Авторизация
*
*
Регистрация
*
*
*
Согласны с условиями сайта?
Генерация пароля