Гетген йылны гьасиллерине гёре савгъатлангъан

Бизин республиканы спорт тармагъына къарайгъан ДР-ни  Гьукуматыны Председателини биринчи орунбасары Анатолий Карибов физкультураны ва спортну гьар тюрлю жураларын оьсдюрмек учун юрютген гьаракаты гьакъда маълумат берген. Дагъыстанлы спортчулар  етишген уьстюнлюклер оланы гьар гюнлюк чалышывуну, олай да физкультурагъа ва спортгъа къарайгъан министерлигини, спорт школаларыны, спортну гьар тюрлю жураларында иш гёреген федерацияларыны бирге чалышывуну натижасы болуп токътайгъаны  гьакъда айтгъан ва олагъа разилигин билдирген. Олимпия оюнлары оьтгерилген йылны алдында етишген уьстюнлюклер олагъа 2016-нчы йылда Бразилиягъа баражакъ бизин уьлкени жыйым командасына къуршалмагъа имканлыкъ бережегине инанагъанын билдирген. 

Шондан сонг спортчуланы ва тренерлени савгъатлав юрюлген. Шону барышында, белгили болгъаны йимик, бизин респуб­ликаны дзюдодан къурулгъан жыйым командасыны баш тренерлери Шамил Алиевге ва Магьамматбек Алиевге, Хасавюрт шагьарда олимпия резервини  спорт школасыны тренери-дарс беривчюсю  Арсен Абакаровгъа, Хасавюрт районну физкультурагъа, спортгъа ва жагьиллени ишлерине къарайгъан бёлюгюню ёлбашчысы Агьмат Исакъовгъа, Буйнакск районну «Пять сторон света» деген спорт школа-интернатыны  тхэквондодан дарс беривчюсю Магьамматтагьир Магьамматовгъа, Дербентде яшланы ва яшёрюмлерини спорт школасыны директору  Рамазан Магьамматовгъа  «Дагъыстан Рес­публиканы физкультурасыны ат къазангъан къуллукъчусу» деген гьюрметли атлар берилген.

«Россияны ат къазангъан тренери» деген оьр атгъа Магьачкъаладагъы олимпия резервини спорт школасыны тренери-дарс беривчюсю Зайнулав Гьасанханов, Хасавюртда Ш. Умахановну атындагъы олимпия резервини  спорт школасыны тренери-дарс беривчюсю  Арсланбек Шабазов лайыкълы болгъан.

Шо гюн савгъатлангъанланы арасында паралимпия  оюнларына гиреген, олай да  олимпия оюнлагъа гирмейген  журалары булан машгъул болуп уьлкени оьлчевюндеги чемпионатларында ва халкъара ярышларда алдынлы ерлеге ес болгъан  кёп санавдагъы спортчулар ва оьзгелер  бар.  

 Гетген йылны гьасиллерине гёре бизин республикада иш гёреген спортну бир-бир жураларыны федерацияларыны ёлбашчылары, ачыкълашдырып айтгъанда, Абдусамат Гьамитов (спорт ябушув), Адилхан Гьанакъаев (авур атлетика), Ражап Абдулатипов (волейбол),  Эсенболат Магьамматов (дзюдо), Магьамматрасул Исаев (регби), Будун Будунов (футбол), Магьаммат Сулейманов (шахматлар), Омар Муртузалиев (енгил атлетика) савгъатлангъан.

 

 Оьз мухбирибиз.

СУРАТДА: спортчуланы ва оланы тренерлерини бир группасы  республиканы спорт тармагъына къарайгъан жаваплы къуллукъчулар булан.

Авторизация
*
*
Регистрация
*
*
*
Согласны с условиями сайта?
Генерация пароля