Европаны чемпиону

Бугюнлерде Буйнакск район администрацияда Европаны чемпионун гьюрметлевге багъышланып шатлы жыйын оьтгерилди. Шо агьвалатда ортакъчылыкъ этмеге грек-рим ябушувну Темиркъазыкъ Кавказ Федерал округуну ва Дагъыстанда грек-рим ябушув федерациясыны президенти, Дагъыстанны Халкъ Жыйыныны депутаты М. Пайзуллаев, грек-рим ябушувну Буйнакск райондагъы федерациясыны ёлбашчысы  И. Аташев, тренерлер ва чакъырылып гелген оьзге ёлдашлар жыйылгъан эдилер. Жыйынны Буйнакск районну башчысы Д. Шихсайитов ачды ва юрютдю.

– Гьюрметли къонакълар, ёлдашлар! Бугюн биз кёпден къаравуллангъан яхшы хабарны эшитип жыйылгъанбыз. Буглендеги спорт школагъа юрюйген Сайгит Бутаев ябушувну грек-рим журасындан Болгарияны Самоков деген шагьарында болгъан Европаны чемпионатында уьстюнлюк къазанып къайтгъан. Ол 54 кило авурлукъда сынавлу кочапланы да утуп, алтын медальгъа ес болгъан.

Бу янгыз бизин район учун тюгюл, республика учун да уллу уьстюнлюк. Ябушувну грек-рим журасындан Дагъыстан федерацияны президенти М. Пайзуллаевге, Буйнакск район федерация­сыны ёлбашчысы И. Аташевге,  тренерлер М-З. Магьамматовгъа ва А. Магьамматовгъа гертиден де  макътавлар тийишли.

Чемпионлар оьзлюгюнден арагъа чыкъмайгъанны барыбыз да яхшы билебиз. Артдагъы эки йылны ичинде грек-рим ябушувда болуп турагъан уллу талпыныв, алгъа инамлы абат алыв барыбызны да къувандыра. 

Депутатланы Буйнакск район жыйыныны къарары булан М. Пайзуллаевге «Буйнакск районну гьюрметли ватандашы» деген атны белгисин ва  шагьатнамасын тапшурмакъны, И. Аташевге буса багьалы савгъат бермекни арив  гёребиз, – деди Д.Шихсайитов.

Гележекде бизин якълы спортчулар дюньяны ва Олимпия оюнланы чемпионлары  болур деген умут булан къалабыз.         

 «Буйнакск район» деген муниципал къурулувну башчысы Д. Шихсайитов Европаны чемпиону С. Бутаевге, гележекде уьстюнлюк­лер ёрай туруп, багьалы савгъат тапшурду.

 

 

 

А. БУГЛЕНЛИ. 

 

СУРАТДА: Д.Шихсайитов савгъат тапшурагъан вакъти.

Авторизация
*
*
Регистрация
*
*
*
Согласны с условиями сайта?
Генерация пароля