Ярышларда Магьачкъаладан, Къызылюртдан, Южно-Сухокумскиден, Буйнакскиден, Шамил, Чарада ва Буйнакск районлардан гелген 100-ге ювукъ спортсмен ортакъчылыкъ этди. Олар оьзлер онгача ва командалагъа къошулуп да ярышгъа чыгъа эди.
Ярышлар бек къужурлу оьтдю. Эргишилени арасында онгача ойнагъанлардан Магьачкъаладан «Локомотив» деген клубдан гелген Н. Агъабалаев чемпион болду. Финалда ол дартс ойнайгъан ёлдашы, сынавлу спортсмен Н. Павличенкону утмагъа болду. Уьчюнчю ерни Буйнакск райондан Ш. Гьажиев къазанды.
Къатын-къызланы арасында да дартс оюнлагъа актив кюйде къуршалгъанлар бары сююндюре. Финалда Магьачкъаладан гелген А. Магьамматова ва Буйнакск райондан П. Къазимагьамматова бир-бири булан ойнады. Магьачкъаладан гелген Дагъыстанны эки керен чемпиону А. Магьамматова уьст болду. Уьчюнчю ерни «Темирхан-Шура» деген Медиа-холдингни вакили А. Гьажимагьамматова алды.
Командаланы оюнлары да оьр даражада юрюлдю. Буйнакск районну командасы (А. Аримов, Б. Къазимагьамматов, А. Сиражаев, П. Къазимагьамматова) финалгъа ерли чыгъып, оьзлер булан ойнайгъан Буйнакск районну экинчи командасын (Г. Татамов, Ш. Гьажиев, Д.Солтанов, А. Чарторижская) утмагъа бажарды. Командаланы арасында Магьачкъаладан гелген «Дагъыстан» деген ГТРК-ны командасы уьчюнчю ерни алды.
Бу оюнланы барышында лап да яхшы ойнагъан айры-айры спортсменлеге де савгъатлар берилди. Чарада райондан гелген кёп яшлы ана С. Рамазанова «турнирни бийкеси» деп токъташдырылды. Дартс оюнларда утгъан команда оьзлени савгъатын да огъар бермеге токъташды.
Оюнланы натижаларына гёре Дагъыстанны жыйым командасы белгиленген. Олар ювукъ арада Къыбла федерал округну оьлчевюндеги чемпионатгъа баражакъ.
Турнирни оьр даражада оьтгерме кёмек этгени саялы Буйнакск районну администрациясына, Халимбекавул юртну башчыларына, ич ишлени Буйнакск район бёлюгюне ва районну АТК комиссиясына ону ортакъчылары разилигин билдирдилер.
Оьз мухбирибиз.
Суратда: ярышны ортакъчылары.
М-Гь. ЗАЙДИНОВ
чыгъаргъан сурат.
