ДЁРТЮНЧЮ КЕРЕН ОЬТГЕРИЛДИ

Бу гезик ярышларда 13 пачалыкъдан 158 кочап ортакъчылыкъ этди. Ярышланы ачылывунда ортакъчылыкъ этген сыйлы къонакъланы арасында Дагъыстан Республиканы Башчысы Рамазан Абдулатипов, ДР-ни Гьукуматыны Председатели Абдусамат Гьамитов, СССР-ни ат къазангъан тренерлери Шамил Невретдинов ва Сираждин Элдаров, Олимпия оюнланы чемпионлары Гьажимурат Магьамматов, Жамал Отарсолтанов, Пекин олимпиадада гюмюш медаль къазангъан къумукъ улан Бахтияр Агьматов, Дагъыстан Республиканы спорт министри Магьаммат Магьамматов ва халкъара федерацияны вакили Анжей Вроньски бар эди.

 – Континентара турнирни биз Хасавюртда дёртюнчю керен оьтгеребиз. Турнирни абуру йыл сайын арта. Ону оьр даражада оьтгермек учун шагьарны башчысы кёп иш этди. Бизге гелген кочаплагъа ва къонакълагъа хошгелдигиз деп айтма сюемен, – деди къурум комитетни председатели, шагьар администрацияны башчысы Арслан Арсланов. Ярышларда ортакъчылыкъ этгенлени арасында Олимпия оюнларда, дюньяны, Европаны ва Россияны чемпионатларында савгъатлар къазангъанлар кёп бар эди. Инг де енгил 57 кило авурлукъда хасавюртлу Исмайыл Мусукъаев, Европаны ва Россияны чемпиону къумукъ улан Нариман Исрапиловну утуп, биринчи ерни алды. Нариман Исрапилов буса экинчи ерде къалды.

Дагъыстанны кочаплары дагъы да беш авурлукъда чемпион атланы къазандылар. Исмайыл Мусукъаевге ва Магьаммат Къурбаналиевге 5 минг доллардан къайры да, савгъатгъа «Лада – Гранта» автомашинлер тапшурулду.

68 кило авурлукъда финалда хасавюртлу Агьмат Магьамматов 3:1 санав булан Азербайжандан гелген Александр Гостиевни утуп, биринчи ерге ес болду. Бу ёлугъув залдагъы къаравчуланы айрыча тергевюн тартды. Хасавюртлу кочап техника бажарывлугъун ва къастлыгъын гёрсетип утма болду. Эки алтын медальны Украинаны ва Белоруссияны кочаплары къазандылар. 70 килода белоруслу кочап Магьаммат-Мурат Гьажиев финалда Исра­йыл Къасумовну ва 125 килода украинли Ален Засев, оьзюню командасындагъы Александр Хоцяновскийни утуп, биринчи ерлени къазандылар.

Мухбирлени соравларына жаваплар бере туруп, халкъара федерацияны вакили, польшалы Анжей Вроньски булай деди:

– Мен Хасавюртда биринчи керен боламан. Ярышланы оьтгериливюне оьр багьа беремен. Уллу зал, ичи къаравчулардан толгъан, уьч халчада къызгъын ябушувлар оьтгерилди. Ярышланы савгъат фондун да эсгерме сюемен. Турнирни ачылыву къужурлу, къаравчуланы тергевюн тартагъан кюйде оьтгерилди.

– Мен гьалиден уьч йыл алда бу турнирде чемпион болгъаным эсимде. Айтагъаным, бу турнирде гючлю кочаплар ортакъчылыкъ этелер. Ярышлар къурумлу оьтгерилегенин айрыча эсгерме сюемен, – деди Бахтияр Агьматов да.

Ярышланы ахырында СССР-ни ва Россияны ат къазангъан тренери къумукъ улан Сираждин Элдаровгъа, 60 йыллыгъына багъышлап, Дагъыстанны тутушуп ябушув федерациясыны исполнительный директору Абшин Абшинов ва Сайитпаша Умаханов багьалы савгъатлар тапшурдулар.

 

Измулла ГЬАЖИЕВ.

Авторизация
*
*
Регистрация
*
*
*
Согласны с условиями сайта?
Генерация пароля