Боксдан бютюнроссия турнир

Дагъыстанны физкультура ва спорт министерлигини сиптечилиги булан ярышлар бу гезик биринчилей Буйнакск районда оьтдю. Турнирни оьтгеривге эсгерилген районну администрациясы ва Буглен юртну башчылары къол ялгъады.

Турнирни ортакъчылары оьзлени авурлукъларында бир-бири булан ябушуп, финалгъа чыкъмагъа гьаракат этди. Оланы арасында дагъыстанлы боксёрлар айра да кёп эди.

47 кило авурлукъда Магьачкъаладан М. Магьамматов, 49 кило авурлукъда Хасавюрт райондан И. Абуев, 56 кило авурлукъда Магьачкъаладан М. Мирзаев, 60 кило авурлукъда Хасавюртдан Р. Алиев, 69 кило авурлукъда Къызлар шагьардан К.Хизболлаев, 75 кило авурлукъда Буйнакскиден Ю. Магьамматов, 91 кило авурлукъда Магьачкъаладан И. Къурбанов медаллар, кубоклар ва акъча савгъатлар булан савгъатланды. 52 кило авурлукъда лап да яхшы ябушгъан буйнакскили боксёр М. Магьамматбековгъа, 81 кило авурлукъда ябушгъан М.Гьажимагьамматовгъа буса хас савгъатлар берилди. Чемпионгъа Буйнакск районну башчысы Д. Шихсайитовну атындан бирдагъы савгъат тапшурулду.

Буйнакск районну Чиркей юртундан яш боксёр Р. Исаев бу ярышларда 3-нчю ерни алды. Алдынлыкъны алгъанлагъа савгъатланы Дагъыстан Респуб­ликаны Башчысыны администрациясыны управлениесини бёлюгюню начальниги А. Алиев, Дагъыстанны орманлыкъ хозяйство комитетини председатели А. Гьажиев, Дагъыс­танны физкультура ва спорт министрини биринчи заместители З. Салавутдинов, Олимпия оюнланы ортакъчысы, Дагъыстанны Халкъ Жыйыныны депутаты Н. Шанавазов, боксдан дюньяны чемпиону Т. Гьайдалов, белгили боксёрлар Гь. Аллагьвердиев, Р. Хайыров, А. Абдулгьамитов ва башгъалар тапшурду.

Спортну оьсювюне аслам къошум этегени саялы Буйнакск районну башчысы Д. Шихсайитов, боксдан Олимпия оюнланы чемпиону Гь. Гьайдарбеков ва Дагъыстан Республиканы Халкъ Жыйыныны депутаты А. Ибрагьимов хас гюмюш белгилер булан савгъатланды.

Спортну халкъара класлы устасы, оьзюню гьюрметине бу ярышлар юрюлген И. Нургьудаев Дагъыстанны физкультура ва спорт министерлигине, «Буйнакск район» деген муниципал къурулувуну башчысына ва турнирни оьтгеривге къол ялгъагъан бары да ёлдашлагъа гьакъ юрекден разилик билдирди.

Ярышларда утгъанлар ювукъ арада Краснодар крайда оьтгерилежек халкъара турнирге баражакъ деп къаравуллана.

 

 

Н. ГЬАСАНОВА.

Авторизация
*
*
Регистрация
*
*
*
Согласны с условиями сайта?
Генерация пароля