Бирлешивден – парахатлыкъгъа

Байрамны алдындагъы гюн Губден юртну авлакъларындан бирине Шамил ва Бабаюрт районлардан,  Хасавюртдан, Каспийск ва  Магьачкъала шагьарлардан,  Мычыгъыш ва Къарачай-Чергес респуб­ликаларындан къонакълар жыйылдылар.  Спорт булан машгъул болагъан кёп санавдагъы адамлар мунда аякъмашин спортдан ва аркъан тартывдан оьтгерилеген 3-нчю ачыкъ чемпионатында ортакъчылыкъ этмек учун гелген эди.

Чемпионат бу йыл дагъыстан халкъларыны Бирлигини гюнюне багъышланып, оьсюп гелеген наслуну террорчулукъгъа ва наркоманиягъа къаршы ругьда тарбияламакъ, жагьиллени спортгъа къуршамакъ, спортну милли жураларына бакъгъан якъдагъы тергевюн артдырмакъ муратланы гёз алгъа тутгъан эди. 

Инг алда Къарабудагъгент районну гьакимбашы Къапур Исаевге сёз берилди. Оьзюню таъсирли сёйлевюнде ол Дагъыс­танны  бырынгъы ва бай тарихинден далиллер гелтире туруп, бизин республиканы бары халкъы учун Дагъыстанны Бирлигини гюнюню нечик агьамияты барны ташдырды.

Шондан сонг Губден юртну администрациясыны ёлбашчысы М. Нухов  къонакъланы ва ярышланы ортакъчыларына   баракалла билдирип сёйледи.

Шо гюн спорт ярышлагъа гелген Дагъыс­тан Республиканы печатгъа ва маълумат къураллагъа къарайгъан министри  Азнавур Гьажиев  оьзюню сёйлевюнде гьар дагъыстанлы оьз элинде парахатлыкъда, тангаласына умут булан яшама сюегенин ва шу ёрукъда оьтгерилеген байрамлар  къоркъув тувдурагъан агьвалатлагъа  адамлар къаршы экенин исбат  этегени гьакъда  эсгерди.

 Губден  – тезден берли  топлангъан бай спорт мердешлери булангъы юрт. Мундан янгыз Дагъыстангъа тюгюл, бютюн дюньягъа  аты белгили   спортчулар ва тренерлер чыкъгъан. Оланы арасындан Олимпия оюнланы ортакъчысы Нюрмагьаммат Шанавазов инг де белгилиси деп айтма ярай.  Аты данггъа чыкъгъан боксёр юртлулары оьтгереген гьар мажлисде  ортакъчылыкъ эте. Шо гюн де ол оьзюню юртлуларыны ва къонакъланы алдына чыгъып сёйледи. Белгили спортчу яш наслуну спортгъа къуршавда ортакъчылыкъ этегени саялы  жыйылгъанлагъа баракалласын билдирди.

            Байрамгъа гелгенлени арасында Да­гъыстанны велоспортуну федерациясыны ёлбашчысы Магьамматали Багьандов да бар эди. Ол да  шо гюнгю ярышлар спорт булан машгъул болагъанланы санавун   артдыражагъына умут этегени гьакъда айтды. 

Ярышлар 40-гъа ювукъ  аякъмашинлени гьайдайгъанланы  оьчешивюнден  башланды. Оланы арасында сынавлу ва жагьил спортчулар да бар эди.

Бу гезик ярышланы 19-йыллыкъ губденли Абдул Сайитгьажиевге утмагъа насип болду.

Къаравчуланы тергевюн ахырына ерли  йибермейген кюйде аркъан тартыв ярышлар да оьтдю. Мунда Дагъыстанны инг гючлю сборный командасы Грозный шагьарда оьтген Кавказ оюнларында алдынлыкъ алгъанлар ортакъчылыкъ эте эди.  Хасавюртну командасы олардан артда къалмасгъа кёп тартышды ва къаравчуланы разилигин къазанды.  

 

 

 

Р. МУСАЕВА.

Авторизация
*
*
Регистрация
*
*
*
Согласны с условиями сайта?
Генерация пароля