Бабаюртлу кочапланы уьстюнлюгю

Турнирни гьакъында айта туруп, шо мердешленген ярышларда алдынлы ерлени алгъанлагъа «Россияны спортуну устасы» деген оьр ат берилеген саялы да, спортчуланы арасында шо турнирде алдынлы ерни алмакъ макътавгъа санала гелген. Сонг да, бу йыл «Наслуланы турнири» оьзюню айланасына 120-дан да артыкъ Россия, Европа ва дюнья оьлчевде танывлу кочапланы жыйгъаны да ону даражасын исбатлай эди.

Бабаюрт районну атындан шо ярышларда ортакъчылыкъ этген Элдар Гьажимурзаев ва Мурат Абакаров учун турнир айрокъда агьамиятлы болгъан. Олар учун шо спортну генг ёлларына элтеген сокъмакъда абатларын инамлы алмагъа, белгили спортчуланы арасында оьзлени гючюн тергемеге имканлыкъ бережекге кочапланы тренери Гьажимурат Гьажиев мекенли биле эди. Гьакъыкъатда шо инаныв биринчи натижаларын да берди. Оьзюню 74 кило авурлугъунда Мурат Абакаров турнирде оьтгерген 4 де ябушувун таза утуп, алтын медальгъа ва ону булан бирге «Россияны спортуну устасы» деген оьр атгъа да ес болду.

– Мен Муратны гючюне ва сынавуна бек инана эдим ва ол мени инанывум негьакъ болма­гъанны исбатлады, – дей кочапланы турнирге гьазирлеген Гь.Гьажиев. – Гележекде де мен эки де спортчудан дагъы да оьрлюклени къаравуллайман ва шолагъа етишмеге гьаракат да этебиз.

65 кило авурлукъда ябушгъан Элдар Гьажимурзаев де оьзю оьтгерген 4 ябушувну 3-сюн утуп, бирисин утдуруп, турнирде гьюрметли 3-нчю ерге ес болгъан. Элдар учун да шо ахырынчы ябушув тюгюл. Ону уьстюнлюклери гележекде дагъы да кёп болажакъгъа умут этебиз  ва бабаюртлу кочаплагъа Олимпия оюнланы чемпионлары болуп, савлай райо­нун ва анадаш къумукъ халкъны сююндюрежекге инанабыз.

 

 

 

Герейхан ГЬАЖИЕВ,

хас мухбирибиз.

Суратда: (солдан онггъа )

Элдар,  тренери ва Мурат.

Авторизация
*
*
Регистрация
*
*
*
Согласны с условиями сайта?
Генерация пароля