Арсен БОРАГЪАНОВ:

 



– Грозный шагьарда оьтгерилген Россияны чемпионатында мен сен авурлукъ гётереген кюйню гёрдюм. Айрокъда сен рывокда 160 кило гётерип, биринчи ерни алдынг. Шо ярышлагъа кёп гьазирлик гёрдюнгмю?

 

– Гертисин айтсам, Россияны чемпионатында медаль къазанма уллу умутум бар эди. Ярышлагъа мени тренерлер Мегьти Макъаев ва Адилхан Гьанакъаев артдагъы эки йылны ичинде яхшы гьазирледилер. Мен КБР-ни Тырнавуз шагьарында жыйым­ларда эки керен болдум. Рывокда 160 кило булан биринчи, толчокда 185 кило гётерип, экинчи ерни алып, гюмюш медаль къазандым. Медаль къазанып, мурадыма етишдим.

 

– Башлап рывокда сени авурлугъунгда дёрт атлет 150 кило гётерме сюйгени кёплени тамашагъа къалдырды. Шону сен нечик гёрдюнг?

 

– Бизин авурлукъда рывокда биринчи урувда 150 килону алагъанлар  ярышларда аз бола. Бу гезик дюньяны ва Европаны чемпионатларында савгъатлар къазангъан атлетлер шолай этгенине мен де тамаша болдум. Сонг мен де 150-ден башлама токъташдым. Ондан сонг 155 ва 160 килону алма болдум. Шо авурлукъну дагъы бириси де гётерме болмады. Рывокда алтын медаль магъа берилди.

 

– Ярышлар юрюлегенде залда сени якълайгъанланы гёрдюм. Оланы арасында бабаюртлулар ва Хасавюрт шагьардан гелгенлер бар эди …

 

– Оланы арасында мени тренерлерим атам, Мегьти Макъаев ва Дагъыстан Республиканы авур атлетика федерациясыны президенти Адилхан Гьанакъаев бар эди. Айтагъаным, Адилхан президент ва тренер гьисапда магъа кёп кёмек этди. Олар залда болса да, магъа юреги авуртагъанны биле эдим ва магъа бираз кёмек бола эди.

 

–Ярышлар битгенли, уьч гюн гетген, арыгъанынг тай­гъанмы?

 

–Таймагъан. Шо гюн мен умуми гьисапда 990 кило гётердим. Шо аз авурлукъ тюгюл. Ону учун бугъар авур атлетика деп айтагъаны тюздюр.

 

– Булай уллу уьстюнлюкге сен Бабаюрт районну тарихинде биринчилей уьст гелгенсен…

 

– Шо – мен саялы уллу сююнч.

 

– Гьали сени Россияны жы­йым командасына къошгъан деген хабар бизин сююндюрдю…

 

– Шогъар мен де сююндюм. Гьали Москва областгъа гьазирликге гетебиз.

– Гележекде спортда не умутларынг бар?

 

– Биринчиси – гелеген йыл Дагъыстанда биринчилей оьтгерилежек Россияны чемпионатында алтын медаль къазанмакъ. Сонг – уллу халкъара ярышларда савгъатлар алмакъ.

 

 

 

Лакъырлашывну язгъан

Измулла ГЬАЖИЕВ.

СУРАТДА: А. Борагъанов.

Автор чыгъаргъан сурат.



Авторизация
*
*
Регистрация
*
*
*
Согласны с условиями сайта?
Генерация пароля