«Анжиге» утма буюрмагъан буса ярай

Футбол оюндан Россияны чемпионатыны он еттинчи туру битди. Бизин «Анжи» йигирма дёртюнчю ноябрде оьзюню футбол майданында Нижний Новгородну «Волга» командасы булан ничьягъа ойнап, он етти турну узагъында утмайлы,турнир таблицада ахырынчы он алтынчы ерни де тутуп, Россияны чемпионатыны «рекордуну» еси болуп токътады.

Оюн башланып, биринчи он беш минутну ичинде «Анжини» чапгъынларыны гючюнден «Волганы» футболистлери, бизин къапугъа багъып чапгъын чы къайдагъы затдыр,оьзлени штрафной майданындан кёп арекге чыгъып да болмай эди. «Анжини» сос­тавында травма алып кёп заман аслу составда ойнамагъан Максимов да чыкъгъангъа къаравчулар сююндю.


Гертилей де, «Анжини» чапгъынчылар булан кёп уллу къы­йынлыкълары бар.Толу кюйде сав болуп битмеген Траоре де, янгыдан травма алып, бу йыл футбол майдангъа чыгъып болагъангъа ошамай. Москвалы «Динамодан» арендагъа алынгъан Павел Соломатин ва бизин Сердер Сердеров бу йыл да айтардай оюн гёрсетмей. Шу шартланы бизин баш тренерибиз Гьажи Гьажиев команда он етти турну ичинде утуп болмайгъаныны себеплерини аслусу деп гьисап эте.



«Волга» булан оюн буса биз оьрде эсгерген он беш минутдан сонг бираз аста болду. Къонакълар биринчилей оьзлени къапусун якъламакъны, бизинкилер буса тез гол гийирмекни гьайын эте туруп, биринчи тайм битди. Къоркъунчлу мюгьлетлер янгыз «Волганы» къапусуну алдында болуп къалмады. Эки мюгьлетни къонакълар да къолдан чыгъарды.



Экинчи таймда Гьажиев Максимовну орнуна Агъаларовну, Сердеровну орнуна Соломатинни чыгъарды,тек оюн гьеч алышынмады. Оюнну ахырында бу оюнну кёп осал ойнагъан Бурмистров он метрдан топну къонакъланы къапусун тюз бакъдырып болмады. Оюн 0:0 санав булан битди.



Оюн битгенде болагъан прес-конференцияда мени: «Сизин нечик эсигизге геле, «Анжи» бу йыл премьер-лигада ерин тас этмей къутулуп болармы? «Биз гелеген чемпионатда премьер-лигада къалажакъгъа сиз оьзюгюз инанамысыз?» – деп берген соравума «Анжини» баш тренери Гьажи Муслимович шулай жавап берди: «Гьал кёп къыйынлы. Мени сынавумда булай гьалгъа биринчилей ёлугъаман. Тек ругьдан тюшме ярамай».



Гьар оюндан сонг «Анжини» иши бирден-бир четим бола, гьалиге алгъа барагъан иш гёрюнмей. Къаравчулар да къарсалама башлай…



Суратда: Максимов

топ булан.


Авторизация
*
*
Регистрация
*
*
*
Согласны с условиями сайта?
Генерация пароля