«Анжи» Европа лигадан тайды

Оюн болгъунча артдагъы уьч гюнню узагъында явуп тургъан сувлу къар ва сувукъ чакъ, батмакъ футбол майданда командалагъа оьзлени бажарагъан гьюнерин гёрсетме бек пуршав этди. Майдандагъы балчыкъ футболистлени аякъ гийимине (бутсаларына) ябушагъанындан ва тайгъакъдан эки де команда бек инжинди. «Анжини» уста футболистлерине айрокъда къыйын эди. Натижада командалар голлар гийирип болмай, оюнну 0-0 санав булан битдирди. «АЗ» буса биринчи оюнну 1-0 санав булан утгъаны саялы оьзюню Евролигадагъы оюнларын давам этежек. «Анжини» баш тренери Гьажи Гьажиев де оюн битгенде берген баянлыгъында болгъан ничьяны бары айыбын сувдан толгъан футбол майдандан гёрегенин билдирди: «Булай майданда чапгъын, гьужум этмекден, оьзюню къапусун якълама, гелеген чапгъынланы гери урма хыйлы тынч», – деди.

«АЗ Алкмарны» баш тренери Дик Адвокат буса оьзюню командасыны насиби барны бу оюндан сонг тюгюл, Голландияда ойналгъан биринчи оюндан сонг да яшырмай эди.

САНАВ ОЮНГЪА ГЁРЕ ТЮГЮЛ

Итнигюн, йигирма дёртюнчю мартда, Анжи-Арена тола-толмайгъан къаравчулар, «Анжи» москвалы ЦСКА-гъа 0-3 санав булан утдургъангъа шагьат болду. «Анжини» ортада ойнайгъан якълавчусу Епуряну, дёрт сари карточкадан сонг берилеген дисквалификация саялы, оюнда ортакъчылыкъ этип болмайгъан саялы, Гьажи Гьажиевге команданы аслу составын мекенли аталама тюшдю. Епурянуну орнунда чыкъгъан Гия Григалава оьзюне тапшурулгъан орта якълавчуну борчун кютюп болмайлы, оюнну узагъында бир нече уллу хата этди, оланы да уьчю­сю «Анжини» къапусуна голлар болуп токътады. ЦСКА-ны оюнну узагъында уьч мюгьлети болду, шо уьч де мюгьлетни москвалыланы чапгъынчылары Муса ва Думбия голлагъа айландырды. Григалаваны хаталары да ва бирдагъы да 2-3 осал ойнагъан футболист де «Анжини» утдургъаныны себеби экенине бир де шеклик ёкъ.

Оюнну «Анжи» нечакъы бола буса да яхшы башлады . Биринчи он минутну ичинде юз процентли мюгьлетлерден Бухаров ва Белялетдинов пайдаланып болмады. ЦСКА хыйлы заман оьзюню къапусуна къысылып турду, тек кёп сийрек чапгъынларыны биринде гол гийирип бажарды. «Анжи» экинчи таймны да бек къужурлу башлады. Акинфеевни къапусуна чапгъынлар я угловой, я штрафной булан бите эди… «Анжини» академиясында ойнайгъан гиччи яшлар этеген хатаны Григалава этгинче шолай турду. Шо хатадан сонг санав 0:2 болду. Гьажиев тез артгъа салгъан оюнчуланы чы­гъара. Бухаровну орнунда – Сердеров, Алиевни орнунда – Смолов. Шо аралыкъда бизин орта якълавчуларыбыз Гьажибеков ва Григалава бирдагъы хата этди – 0-3. Оюн шолай битме де битди.

Прес-конференцияда Слуцкийни бек шат, Гьажиевни бек пашман гёрдюм.

Шарабутдин Кишиев.

Суратда: Думбия оюнну санавун ача…

Авторизация
*
*
Регистрация
*
*
*
Согласны с условиями сайта?
Генерация пароля