Алты – алтын медаль

– Хасавюртда округну ярышлары оьтгерилегенли бешинчи керен. Ярышланы ортакъчылары учун бизин уллу спорт къалада бары да имканлыкълар яратылгъан. Ярышлар уллу спорт байрам болажагъына инанаман. Округну бары да респуб­ликаларындан гючлю яш кочаплар гелген, – деди шагьар администрацияны башчысыны заместители Тагьир Гьажиев.

Ярышланы судьяларыны башчысы Омарасгьаб Къурамагьамматов ишин намуслу кютдю.

– Бу ярышларда 249 кочап ортакъчылыкъ этди. Дагъыстанны кочаплары алты тюрлю авурлукъда биринчи ерни алдылар. Биринчиден бешинчи ерлени къазангъанлар Сочи шагьарда оьтгерилежек Россияны чемпионатына баражакълар, – деди баш судья Омарасгьаб Къурамагьамматов.

Савгъатлы ерлени къазангъанланы арасында дёрт къумукъ улан да бар эди. Къаягентли Даниял Маликов 84 килода финалда хасавюртлу Гьажи Ражабовну утуп, округну чемпиону болду. Ол бу ярышларда уьст гелме гьар ёлугъувда бек къаст этди ва утма болду. Шу дёрт де кочап бугюнге – бизин халкъны арасында гележеги бар уланлар. Россияны чемпионатында да олар савгъатлар къазанар деп умут этебиз. Уьчюнчю савгъатланы 96 килода къоркъмаскъалалы Зайнулла Къурбанов, 120 килода хасавюртлу Магьамматрасул Идиков ва къоркъмаскъалалы Минатулла Къурбанов къазандылар. Олар да Россияны чемпионатында ортакъчылыкъ этежеклер.

– Айрокъда 96 килода кёп гючлю кочаплар ортакъчылыкъ этдилер. Мен уьйретеген Зайнулла Къурбановгъа уьчюнчю ерни къазанма тынч болмады. Энни Сочи шагьарда да савгъатлы ерлер къазанма къаст этежекбиз, – деди Россияны ат къазангъан тренери, къумукъ улан Али Алиев.

– Дагъыстанны кочаплары бу ярышларда 22 медаль къазанды. Оланы арасында алты биринчи, алты экинчи ва он уьчюнчю ерлени къазанып, умуми команда гьисапда биринчи ерге чыкъды. Россияны чемпионатында да уьч-дёрт чемпион болар деп умут этебиз, – деди Дагъыстанны спорт министерлигини бёлюгюню начальниги Сиражудин Гьамитов.

Измулла Гьажиев.

Суратда: (солда) къоркъмаскъалалы

Зайнулла Къурбанов.


Автор чыгъаргъан сурат.

Авторизация
*
*
Регистрация
*
*
*
Согласны с условиями сайта?
Генерация пароля