Абурлады, сыйлады…

 

Гьали-гьалилерде райондагъы спорт школада ябушмагъа уьйренген Зайнутдин Къурбанов тутушуп ябушувдан яшёрюмлени арасында Европаны чемпионатында экинчи ерни алып, дос-къардашын да, юртлуларын да сююндюрдю. Тутушуп ябушувдан Европада экинчи болмакъ – о тынч масъала тюгюл. Экинчи деп айтса да, артдагъы ябушуву 1:1 санав булан битген. Биринчи ерни буса артдагъы баллны алгъан спортсменге берген. Тенг ябушса да, Зайнутдинге экинчи ер тюшген.

Тутушуп ябушувда яхшы гьасиллер гёрсетген, Европада экинчи ерни алгъан спортсменни районну башчысыны къуллукъларын заманлыкъгъа кютеген Магьаммат Бамматов оьзюню янында къабул этди. Шо гюн жагьил спортсменге Магьаммат Бамматов «Лада Гранта» деген машин де берди.

Жагьил спортсменни уьс­тюнлюгю булан къутлама район администрациягъа ону къурдашлары-ёлдашлары, танышы-билиши, спорт школаны тренерлери, Зайнутдинни башлапгъы тренери, осал эшитегенлени арасында Олимпиада оюнланы чемпиону  гелген эдилер. Магьаммат Бамматов Зайнутдинни биринчи уллу уьстюнлюгю булан къутлай туруп, дюнья чемпионатында да биринчи ерни алмакъны ёрады.

Шо гюн З. Къурбановну атына кёп-кёп ёравлар ва  исси сёзлер айтылды. Биз де газетни кёп санавдагъы охувчуларыны атындан Зайнутдинни уьстюнлюгю булан къутлап, огъар спортда дагъы да уллу оьрлюклеге етмекни ёрайбыз. Зайнутдин, сагъа энниден сонг биринчилерден болмагъа Аллагь насип этсин!

 

 

 

Ж. Закавов.

Суратда: М. Бамматов

З. Къурбановгъа автомобиль савгъат эте.

Авторизация
*
*
Регистрация
*
*
*
Согласны с условиями сайта?
Генерация пароля