Жакай ЖАКАЕВ: «Шахмат оюнну усталары ортакъчылыкъ этежек деп къаравуллана»


Бугюн, октябр айны 25-нде, «Дагъыстан» деген маълумат агентлигинде оьтгерилген прес-конференция болду. Шону барышында бизин республиканы шахмат оюн федерациясыны ёлбашчысы, халкъара даражадагъы гроссмейстер Жакай Жакаев ва ону заместители Гьапис Гьаписов маълумат къуралланы вакиллери булан ёлукъду.



Оьтгерилген прес-конференцияны лап башында билингени йимик, октябр айны 27-28-нде Магьачкъала шагьардагъы Шахматланы уьюнде белгили муаллим ва жамият чалышывчу Нюрбагьанд Гьаписовну эсделигине багъышлангъан шахмат оюндан ярышлар юрюлежек. Ж. Жакаевни сёзлерине гёре, эсгерилген шо ярышлар бу йыл сегизинчилей оьтгериле.


 Н. Гьаписовну эсделигин даимлешдирмекден къайры да, шахмат оюн булан иштагьланагъанланы санавун артдырмакъ ярышланы алдына салынгъан аслу борчлардан гьисаплана. Бизин республиканы тахшагьарында оьтгерилеген шо ярышлар шахмат оюндан Россияны гран-при кубогуна ес болмакъ учун юрюлеген ярышланы бир тирети болуп токътай.


 Россияны ва Дагъыстанны шахмат федерацияларындан къайры да, ДР-ни физкультурагъа ва спортгъа къарайгъан министерлиги, олай да Магьачкъала шагьарны спортгъа, туризмге ва яшёрюмлерини ишлерине къарайгъан комитети ярышланы сиптечилери гьисапда арагъа чыкъгъан. Гьар заманда да йимик шо ярышларда шахмат оюнну бизин уьлкени гьар тюрлю регионларындан гелген усталары ортакъчылыкъ этежек деп къаравуллана. Ачыкълашдырып айтгъанда, шахмат оюндан «Россияны биринчи даражалы устасы» деген атгъа лайыкълы болмагъанлар шо ярышларда ортакъчылыкъ этмеге болмай.



Г. Гьаписов билдиргени йимик, шо ярышлар оьзюню атасыны эсделигине бу йыл айрыча ону 80 йыллыгъына багъышланып оьтгерилежек. Артдагъы йылларда мердешли кюйде оьтгерилеген шо ярышлар башлапгъы вакътилерде Н. Гьаписов тувуп оьсген, олай да муаллим ва ерли гьакимлик къуллукъларда ишлеп тургъан Лаваша районда оьтгерилип тургъан. Артдагъы беш йылны ичинде буса шо ярышлагъа бизин уьлкени лап да бажарывлу шахматистлери къуршала. Шо ярышлар швейцар къайдада 11 тиретде юрюле. Ону алдынлыларына аслам акъча савгъатлар да бериле. Бу йыл да шолай болажакъ. Ярышларда 100-ден артыкъ шахматны усталары ортакъчылыкъ этежек. Оланы арасында гьаман да йимик лавашалы шахматистлер де болажакъ.



Шахмат оюндан оьтгерилген шо ярышланы гьасиллери гьакъдагъы маълумат бизин газетни бетлеринде берилежек.



Авторизация
*
*
Регистрация
*
*
*
Согласны с условиями сайта?
Генерация пароля