Инамлы уьстюнлюк


Белгили экени йимик, август айны 31-нде Американы Бирлешген Штатларыны Атлантик Сити шагьарында низамсыз ябушувларыны бирлешивю ММА еттинчилей юрюлеген ярышланы оьтгерген. Эсгерилген ярышларда савлай дюньяда да аты айтылгъан бизин белгили кочабыбыз Бозигит Атаев ортакъчылыкъ этген.



Артдагъы бир-эки йылны ичинде ол ябушувларда ортакъчылыкъ этмей тургъангъа да къарамайлы, шо ярышларда гене де усталыгъы булан бирге бажарывлугъун гёрсетген. Оьзю­ню ябушув юрюлеген халчада енгмеге болагъанлар аз экенин бирдагъы керен де исбатлагъан.



Ачыкълашдырып айтгъанда, шо ярышланы оьлчевюнде юрюлген ябушувланы бирисинде Бозигит Атаев американлы Шон О’Коннелл булан ёлукъгъан. Ябушувну биринчи тиретинде бизин кочап оьзю булан тогъатартмагъа чыкъгъан спортчудан уьст гелген. Дейгеним, ябушувгъа тергев этип турагъан судья Бозигит Атаев американлы спортчу Шон О’Коннелл булан юрютеген тогъатартывну эки минут алда токътатмагъа борчлу бола.



Неге тюгюл, врач Шон О’ Коннеллни бетиндеги ярылгъан ерлерине къарамагъа тарыкъ болгъан. Шо мюгьлетлер де, озокъда, кочаплагъа аз болса да, ял алмагъа имканлыкъ берген. Шогъар да къарамайлы, Шон О’Коннелл оьзюне Бозигит Атаевден тиеген къапасланы авурлугъун гётермеге болмагъан. Судья ябушувну токътатгъан.



Оьзюню гючюн, къуватын къоллап, инг алда кёп йылланы боюнда ябушувну юрютювде мекенли сынав топлагъаныны яхшылыгъындан бирдагъы да уьст гелген Б. Атаевни гьакъ юрекден къутлайбыз. Газетни бары да охувчуларыны атындан яхшы савлукъ булан бирче гележекде дагъы да оьрлюклеге етишмекни ёрайбыз.



Авторизация
*
*
Регистрация
*
*
*
Согласны с условиями сайта?
Генерация пароля