Яхшы уьстюнлюклеге етишген

 
 Белгили экени йимик, январ айны 25-ден 28-не ерли Красноярск шагьарда Иван Ярыгинни эсделигине багъышлангъан спортну тутушуп ябушув журасындан гезикли ярышлар оьтгерилди. ДР-ни физкультурагъа ва спортгъа къарайгъан министерлигини хас сайтында билдирилегени йимик, бизин республиканы жыйым командасына къуршалгъанлар ону гьасиллерине гёре инг тизив  уьс­тюнлюклеге етишген.



Ачыкълашдырып айтгъанда, бизин команда гьар тюрлю даражадагъы 11, шоланы арасында 7 алтын, 4 гюмюш медаль къазанмагъа болгъан.  Завур Угуев (57 кило), Гьажимурат Рашитов (61 кило), Ильяс Бекболатов (65 кило), Магьаммат Къурбаналиев (70 кило), Агьмат Гьажимагьамматов (79 кило), Абдулрашит Садулаев (92 кило) ва Муридин Кушков (125 кило) оьзлени усталыгъы булан алтын медаллагъа ес болмагъа бажаргъан.


Исмайыл  Мусукаев (61 кило), Агьмат Чакаев (65 кило), Магьамматрасул Къазимагьамматов  (70 кило), Расул Магьамматов (97 кило) буса гюмюш медаллагъа лайыкълы болгъан.


Эсгерилген ярышларда алдынлы ерлени алгъан бизин республиканы жы­йым командасына къуршалгъан кочаплар булан ёлугъуп,  Дагъыстанны Гьукуматыны Председателини борчларын  кютеген Абдусамат Гьамитов къутлагъан. Шо ёлу­гъувну барышында А. Гьамитов ярышларда уьстюнлюклеге етишген кочапланы ва оланы тренерлерин къутлай туруп, бизин республиканы ёлбашчыларыны атындан оьзюню разилигин билдирген. Бизин кочаплар ярышларда  етишген уьстюнлюклер  ювукъ вакътини  ичинде оьтгерилежек Европаны чемпионатында да  мекенли оьрлюклеге етишмеге болажагъына инамлыкъ тувдурагъаны гьакъда эсгерген.


ДР-ни  Гьукуматыны Председателини биринчи заместителини борчларын  кютеген Анатолий Карибов, ДР-ни  физкультурагъа ва спортгъа къарайгъан министрини борчларын кютеген Магьаммат Магьамматов ортакъчылыкъ этген шо ёлугъувда Каспийск шагьарда спортну ябушув журасындан оьтгерилежек Европаны чемпионатына байлавлу къурумчулукъ масъалалар да арагъа салынып ойлашылгъан.

Бизин мухбирибиз.

Авторизация
*
*
Регистрация
*
*
*
Согласны с условиями сайта?
Генерация пароля