Жамиятны оьсювюню ёллары белгиленген


            Жыйынны ача туруп, районну башчысы Д. Шихсайитов, Дагъыстанны Башчысыны Чакъырыв кагъызында бизин жамиятны бары да тармакъларындагъы ишлер бар кююнде суратлангъанын айтды. Шонда ерли гьакимликлени чалышывуна да аслу ер берилгенин эсгерди.
    Сонг ол Ю. Умавовгъа сёз берди. Ол оьзюню сёйлевюнде Дагъыстан Республиканы оьсювюню аслу проектлери гьакъда хабарлады, бираз алларда шо проектлени яшавгъа чыгъарывгъа байлавлу оьтгерилген сессияны ишинде не йимик къарарлар къабул этилгенни билдирди.
    – Гёз алгъа тутулгъан ва яшавгъа чыгъарылып турагъан аслу проектлер инг башлап республикабызны экономикасыны оьсювюн таъмин этивге, яшавну бары да тармакъларындагъы гьалны ёрукълашдырывгъа бакъдырылгъан, – деди Ю. Умавов. – ДР-ни Башчысы Р. Абдулатиповну Ча­къырыв кагъызында эсгерилегени йимик, алда токътагъан бары да социальный борчланы тайышывсуз кюйде кютмеге герекбиз. Озокъда, экономика якъдан гьали де чечилмеген хыйлы масъалалар бар. Бизин респуб­ликабыз учун АПК-ны оьсювю – айрокъда агьамиятлы масъала.
    «Асувлу агропромышленный тармакъ» деген проектни оьлчевлеринде бизин районда этилеген ишлени гьакъында жыйында район администрацияны башчысыны 1-нчи заместители А. Жафаров тындырыкълы кюйде маълумат берди. Ону сёзлерине гёре, артдагъы йылланы ичинде юртларда адамланы гьайван-малыны санаву арта бара, тавукъ-жижек сакълайгъанлар, овощлар учун теплицалар, гьайванлагъа аранлар къурагъанлар кёп болгъан.
    Гетген йыл, 2013-нчю йылны санавлары булан тенглешдиргенде,  районда онгача абзаръягъа ва фермер хозяйстволар болдургъан этни, сютню, йымырткъаны къадары артгъан. Юрт хозяйство продукталар болдурувчулар 8 минг гектардан да къолай ерни сюрюп къоллагъан. 2015-нчи йылны тюшюмю учун, 8635 гектар ер къолланажакъ деп къаравуллана.
    Сонг да, районда 45 гектаргъа бавлар салма хыял бар. Шоланы 15 гектары интенсивный бавлар болажакъ. Емиш болдурув артдагъы йылларда Чиркейде айрокъда яхшы салынгъан. Бу юртда иш гёреген «Архар» деген фермер хозяйство бир мингден де артыкъ гьайван-мал сакълап болагъан кюйде уллу ферма къуруп тура. Шолай да, «Чиркей» деген ГУП жынслы маллар сакълавну гьайын эте. Буссагьат олар малланы къышлавун республикадан тышда оьтгере.
    Жыйында айтылгъаны йимик, бизин районну Къадар боюнда яшайгъанлар да гьайванланы кёп сакълай, эки якъгъа эт, картоп ва къапуста сатып, къазанчларын артдыра. Олар гьар йыл 6 мингден де артыкъ тон этни къыргъа ташый. Этни ва сютню эки якъгъа йибермей, еринде ишлетип, консервалар ва акъкъатыкълар этип болагъан кюйде цехлер ачма умут бар.
    Буйнакск район администрацияны башчысыны заместители С. Арулмагьамматов «Экономиканы ачыкълашдырыв» деген аслу проектни гьакъында чыгъып сёйледи. Бюджетни харж маяларын артдырывну муратларында бизин районда ведомствоара комиссия къурулгъан ва ортакъ гючлени яхшылыгъындан 2014-нчю йылда алдан берли де гьисапгъа алынмай тургъан имаратлар, сатыв-алыв ва башгъа биналар гьисапгъа салынгъан. Буйнакск район гетген йыл ерли налоглар жыйывну планын 108 процентге кютмеге болду. 
    Сонг жыйында адам гючлени къоллавну проектин яшавгъа чыгъарыв гьакъда район администрацияны башчысыны заместители Гь. Ражбутдинов маълумат берди. Ол билдирген кюйде, артдагъы эки йылны ичинде Буйнакск ра­йонда бир школа, эки больница, дёрт яшлар баву пайдаландырывгъа берилген, Тёбен Къазаныш ва Чиркей юртларда бирдагъы эки школа къурулуп тура. Оьр Жюнгютей юртда ювукъ арада янгы яшлар баву ачылажакъ. Савлукъ сакълав ожакълагъа гетген йыл 3 «Скорая помощь» машин берилди. Маданият, спорт  тармакъларда да ишлени гьалы яман тюгюл. Бизин районда биринчилерден болуп  Тёбен Къазанышда мердешли маданиятны центрын ачма бажарылды. Маданиятны йылында кёп санавда пайдалы адабият ахшамлар, агьамиятлы ёлугъувлар  оьтгерилди.  Буссагьат районну оьлчевюнде 4 спорт школа ишлей. Тёбен Къазанышда ва Атланавулда янгы спорт залланы къурулушу узатыла. Спортсменлер етишеген уьстюнлюклер де гёрмекли.
    «Пачалыкъ ишлени асувлу кютюлювю» деген проектни гьакъында жыйылгъанлагъа Буйнакск район администрацияны къуллукъчусу М.Къурбанова хабарлады ва шо проектни гьар пунктун яшавгъа чыгъарывгъа байлавлу не йимик чаралар гёрюлегенни айтды. Район администрацияны Интернетде оьзюню сайты, эки маълумат къуралы бар. 2014-нчю йылны ахырында районну оьлчевюнде адамланы гьар тюрлю къуллукъларын кютеген МФЦ ачылды. Гьалиге ерли шо центр къысгъа болжалны ичинде адамланы 1600 къуллугъун кютген.
    Буйнакск район администрацияны башчысы М. Маликов эсгергени йимик, гетген йыл районну чалышыву яман болмады, администрацияны коллективи бир къолну бармакъларыдай сыкълашып ишлей, шону учун санавлар да яхшылаша бара. Амма алда дагъы да уллу борчлар токътагъан. Дагъыс­танны оьсювюн таъмин этивге бакъдырылгъан проектлени уьстюнлю кюйде яшавгъа чыгъарывда ерли ёлбашчы къурумланы асувлу гьаракаты болмагъа герек.
    Жыйынны ахырында Дагъыстан Рес­публиканы промышленност, сатыв-алыв ва инвестиция министри Ю. Умавов «Буйнакск район» деген муниципал къурулувуну башчысы Д. Шихсайитовгъа Гьюрметлев грамота тапшурду. Шо грамотагъа Буйнакск район республикадагъы инвестиция ишлени оьсювюнде актив кюйде ортакъчылыкъ этегени учун лайыкълы болгъан.

Автор: А.ЗАЛИМХАНОВ.
М-Гь. ЗАЙДИНОВ чыгъаргъан сурат.

Авторизация
*
*
Регистрация
*
*
*
Согласны с условиями сайта?
Генерация пароля