Бабаюрт районну, мисалгъа алгъанда, районда наркоманиягъа къаршы этилеген чаралар таъсирли деме ярай. Бугюн район больницада 20 наркоман гьисапгъа алынгъан. Олар булан тийишли къуллукъланы вакиллери тарыкъ ишин де юрюте. Шону булан бирге районну яшёрюмлери булан наркоманияны гьакъында тюз маълуматлар бермек, ону балагьыны гьакъында ва ондан оьзлени ва ювукъ адамларын къоруп сакъламакъ учун не йимик чаралар гёрмеге герекни айтып, школаларда оьр класланы охувчулары булан лакъырлашывлар оьтгерив яхшы мердешге айлангъан. Ахтарывлар токъташдыргъан кюйде, бабаюртлу яшёрюмлер наркоманиягъа оьзлени тюбюкъарадан къаршылыгъын билдире.
Буса да къоркъунчлукъ бар. Наркомания къачан ва не ерде оьзюню бирдагъы къурбанын къаршылажакъны билмеге къыйын. Шо балагьны себеби недир? Яшёрюмлер неге шо ёлгъа тюше? Шо соравлагъа жавап тапмагъа тынч тюгюл. Амма шо соравланы уьстюнде ишлемек учун артдагъы гюнлерде Адил Янгыюртдагъы орта школагъа Уцумиюртдагъы, Хамаматюртдагъы орта школаларыны оьр класларыны охувчулары «дёгерек столну» айланасында пикру алышдырдылар.
Ери гелгенде эсгермеге ярай, «дёгерек стол» оьзюню айланасына районну гьакимлик къурумларыны, билим берив тармакъны, дин идараланы ва аманлыкъ сакълав къурумланы вакиллерин къуршагъан эди. Гьакъыкъатда ачыкъ ва пайдалы лакъыр да болду.
Наркоманияны гьакъында айта туруп, «дёгерек столну» ортакъчылары бугюнгю гьалгъа таъсир этеген илму-техника чараланы масъаласын да гётердилер. Айтагъаным, эгер гьали болгъанча яшёрюмлер енгил наркотиклени къоллай эди буса, гьали ону ерине химия къошулчанлардан этилген авур наркотиклер арагъа чыкъгъан. Чинкдеси – ону багьасы. Айтагъаным, алдын наркоманлар учуз енгил наркотиклени къоллай эди буса, гьали шо багьагъа химия къошулчанлардан этилген «Дезоморфин» ва арт вакътиде уллу гюч булан яйыла барагъан янгы наркотик «Спайс» этмеге яда алмагъа болалар. Амма оьзюню гючюне ва адамны къаркъарасына этеген заралыны оьлчевюне гёре халкъ арада «крокодил» деп айтылагъан наркотиклени гьар гюн къоллайгъан адам гьакъылын тас эте, эмсиз аврувлагъа тарый ва гьакъыкъатда ону яшаву орта ёлда къыркъыла.
– Мен бирдагъы бир затны эсгермеге сюемен, – дей Бабаюрт район администрацияда яшёрюмлени, маданиятны ва спортну ишлерине къарайгъан бёлюгюню ёлбашчысы Илмидин Абдуразакъов. – Бугюн оьр класлагъа чыкъгъан яшлар шону заралын толу кюйде англамай, енгил наркотиклени къолламагъа да амракъ бола барагъаны бизин талчыкъдыра. Шону булан эринине эр мыйыгъы битмеген яшлар оьзлени савлугъуна уллу зарал гелтирип туралар.
Сонг да, яшёрюмлер бугюн бары да адамгъа ортакъ болуп битген Интернет деген бютюндюнья тору яшланы гележегине этеген таъсирни де эсгердилер. Оланы пикрусуна гёре, бугюн Интернетден гьар адам оьзюне не маълумат да алып бола, шону ичинде наркотиклени къайдан алып болагъанны да, ону нечик этип болагъанны да билелер. Шо ишге, яшёрюмлени пикрусуна гёре, хас къурумлар яхшы тергев бермеге герек. Ёгъесе ерлерде гёрюлеген чаралар бошуна гетмеклик бар.
«Дёгерек столну» жамын чыгъара туруп, мен, шону ортакъчысы гьисапда, бир затгъа мюкюр болдум: яшёрюмлер оьзлени гележеги булутсуз болсун учун не ишни тюбюне тюшмеге де гьазирлер. Олар барысы да дегенлей наркоманияны балагьын да, о оьзлени гележегине нечик тогъаслар салмагъа болагъанны да яхшы билелер ва савлай жамиятны шону булан ябушмагъа чакъыралар.
«Дёгерек столну» къургъанлар буса районну оьзге юртларында да о меселде лакъырлашывлар оьтгермеге ва «дёгерек столну» ортакъчыларыны пикруларын яшавгъа чыгъармагъа гьаракат этмеге герекни билдирдилер.
Герейхан Гьажиев,
хас мухбирибиз.
Суратда: «дёгерек столну» айланасында.
