Яшёрюмлени гюню

Яшёрюмлени байрамы Совет Союзну заманында да оьтгериле болгъан. Шо байрам 1958-нчи йыл 7-нчи февральда белгиленген ва июн айны ахырынчы къаттыгюнюнде оьтгерилип тургъан.

Бугюнлерде Россияда 39, 6 миллион яшёрюмлер бар. Шо уьлкебизде яшайгъан халкъны 27 проценти бола. Россияда яшёрюмлер политика булан машгъул болма сюймей. Шону булан бирче оланы алдында кёп къыйын масъалалар да токътагъан. Уьй болагъан жагьиллеге яшавлукъ уьйлер етишмей, иш булан таъмин этилмей. Ичкичилик, наркомания, СПИД аврувлар яшёрюмлеге бек зарал гелтире. Шоланы таъсиринден яшёрюмлер этеген жинаятчылыкъ ишлер де кёп бола. Школаны битдиреген яшланы янгыз он процентини савлугъу яхшы деп айтма ярай.

Артдагъы йылларда яшёрюмлер аналыкъ капиталны ва ипотеканы имканлыкъларындан пайдаланып, яшавлукъ уьйлер алма бола. Шону булан бирче янгы тувагъан яшланы санаву да йылдан-йыл арта. Тек тыш пачалыкъларда йимик бизин жагьиллер агьлю къурма алгъасамай. Башлап оьр охув ожакъны битдирип, касбугъа ес болмагъа, сонг буса оьзлени гёнгю алагъан ишге тюшмеге къаст эте. Ондан сонг яшавлукъ уьй алмагъа чалыша ва агьлю къурма къарайлар. ЗАГС этмей бирче яшайгъан агьлюлер де кёп бола бара.

Россияны Гьукуматы жагьиллени гележеги яхшы болсун учун кёп иш эте. Яшёрюмлени политикасыны проекти онгарылып ишге гийирилген. Жагьиллени иш булан таъмин этмек учун проектлер къурулгъан ва яшавгъа чыгъарыла. Яшёрюмлени клублары ва центрлары ачылгъан. Студентлени, жагьиллени фестиваллары оьтгериле.

Булай байрам янгыз Россияда тюгюл, оьзге пачалыкъларда да юрюле. Яшёрюмлени халкъара гюню 12-нчи августда белгилене.

Яшёрюмлени Бютюндюнья совети де бар. Бу къурум Уллу Ватан давну заманында къурулгъан ва фашизмге къаршы иш гёре болгъан. Шо къурумну сиптечилиги булан дюньяда кёп санавда яшёрюмлени ва студентлени фестиваллары да оьтгериле.


Бизин мухбирибиз.

Авторизация
*
*
Регистрация
*
*
*
Согласны с условиями сайта?
Генерация пароля