Ватандашланы ихтиярлары якълана

 

Белгили кюйде, РФ-ни Аслу Законуна гёре бизин пачалыкъда федерал, регион ва ерли гьакимлик къурумлар иш гёре ва ватандашланы ихтиярларын якъламакъ, эркинликлерин болдурмакъ, яшавлукъ талапларын яшавгъа чыгъармакъ учун чалыша. Олай да, пачалыкъны ишлерине ватандашланы актив кюйде къуршамакъ муратда жамият советлер ва палаталар булан бирче, жамият бирлешивлер къурула.

____________________________________________________________



Июль айны 19-нда Къарабудагъгент районну билим берив управлениесини жыйынлар оьтгерилеген залында Къарабудагъгент районну жамият палатасыны генгеши де оьтгерилди. Генгешде ватандашланы пачалыкъны гьакимлик ишлеринде ортакъчылыкъ этмеге ихтияры барлыгъы гьакъда айтылды.


Оьтгерилген генгешде гётерилген масъалагъа гёре аслу докладчы гьисапда Къарабудагъгент район жыйыныны депутаты, жамият ишлерине ва дин масъалалагъа къарайгъан комиссияны ёлбашчысы Абсалутдин Мурзаев сёйледи. Оьзюню сёйлевюнде А.Мурзаев оьзбашына иш гёреген ерли муниципал гьакимлик къурумланы ихтиярлары ва борчлары гьакъда айтгъан сонг, уставланы къабул этив ва бюджетлени толуву гьакъдагъы масъала жамиятны арасына салып ойлашылмагъа борчлу экенлигин аян этди. Сонг да, федерал законгъа гёре муниципал гьакимлик къурумлар оьзлени ишин хас сайтларда гёрсетмеге тарыкълыгъын англатды.


А.Мурзаев Дёргели, Къакъашура, Манасгент ва Уллубийавул юртлардагъы иш гёреген жамият советлер ДР-ни Юстиция министерлигинде гьисапгъа алынгъанын айта туруп, айрокъда Уллубийавул юртну жамияты актив кюйде оьзлени талапларын яшавгъа чыгъармагъа бажаргъанын эсгерди. Демек, «Буйнакский» ГУП-ну 2208 гектар ерлерин юрт администрацияны еслигине алгъанын бирдагъы керен англатды.


А.Мурзаевни ойларына гёре, эгер ерли муниципал къурулувлар ва депутатлар оьзлени борчларын тийишли даражада кютсе, бир совет де тарыкъ тюгюл. Юртланы башчыларын, депутатларын, жамият советлени ва дин къуллукъчуланы ол бирлешип, сыкълашып ишлемеге чакъырды.


Олай да, А.Мурзаев оьзюню сёйлевюнде Бабаюрт ва Ногъай районлардагъы гёчювюл топуракъларда ерлешген ва къурулгъан юртланы законгъа къыйышмайгъан кюйде толу ихтиярлы муниципал къурулувлар этмеге республиканы ёлбашчылары айланагъанын айрыча эсгерди. Амма РФ-ни Аслу Законуна гёре, гьар жамият ва миллет буса оьзю минадан берли яшавлукъ сюреген топуракъларыны еси болмагъа ихтиярлы экенлигин ташдырды. Гьакъыкъатда ватандашланы шо ихтиярлары толу кюйде якъланмайгъанны ачыкъ этди.


Генгешни барышында сёйлеген районну яшёрюмлерини палатасыны ёлбашчысы М. Кулавов, Манасгент юртну жамият советини ёлбашчысы М. Къазимагьамматов, районну тамазаларыны советини ёлбашчысы А. Мамагишиев, Къакъашура юртну тамазаларыны советини ёлбашчысы А. Акаев, Дёргели юртну жамият советини ёлбашчысы Ю Амиров, Къарабудагъгент юртну гьакимбашы М. Гьасанов ва Къарабудагъгент жамият советини ёлбашчысыны заместители Камил Муратов гётерилген масъалагъа гёре оьзлени ойларын ва пикруларын айтды. Масала, М. Кулавов эсгерген кюйде, эгер юртлардагъы жагьиллер палатаны ишинде ортакъчылыкъ этмей буса, оланы алышдыражагъын аян этди. М. Къазимагьамматов районну администрациясындан ва районну жамият палатасындан «Манаскент» ГУП-ну топуракъларын юрт администрацияны еслигине чыгъармакъ учун болагъан кёмегин этмекни тиледи.


Районну жамият палатасыны генгешинде районну башчысыны 1-нчи заместители А.Гьажиев де оьзюню ойлары ва таклифлери булан сёйледи. Демек, районну администрациясыны ёлбашчылары районну ичинде иш гёреген жамият бирлешивлеге ва ватандашлагъа закон булан гёрсетилген эркинликлерин ва ихтиярларын якъламагъа шартлар болдуражагъын ачыкълашдырды.


Генгешни ишин тамамлай туруп, районну жамият палатасыны ёлбашчысы М.Гьабитов ону ортакъчыларына разилигин билдирди ва гётерилген масъалалагъа гёре район администрациягъа таклифлер бережегин айтды.

Багьавутдин Саматов.

СУРАТЛАРДА: генгешни ортакъчылары.

Авторизация
*
*
Регистрация
*
*
*
Согласны с условиями сайта?
Генерация пароля