Урушбатчылыкъны енгме къыйын

Урушбатчылыкъгъа къаршы чаралар 2008-нчи йылны декабр айыны 25-нде чыкъгъан Федерал законда да бар. Шо чараланы яшавгъа чыгъармакъ учун 2010-нчу йылда урушбатчылыкъгъа къаршы стратегия да белгиленген.

Урушбатчылыкъны алдын алмакъ учун маълумат къуралларда ва ДР-ни Ич ишлер министерлигини янындан чаралар да гёрюле. Буса да, урушбатчылыкъ йылдан-йыл артагъаны, айтылгъан сёзлер еринде къалагъангъа, мекенли чаралар яшавгъа асталыкъда чыгъагъангъа шагьатлыкъ эте.

«Россияны ич ишлер минис­терлигини къурумларыны аслу чалышывуну 2014-нчю йылдагъы ёллары гьакъындагъы»  директиваны талаплары да  экономика тармакъда болагъан жинаятчылыкъгъа къаршы бакъдырылгъан. Оьзюню агьамиятлыгъын гьисапгъа алып, урушбатчылыкъгъа ДР-ни ич ишлер министерлигинде оьтгерилеген координация генгеш­лерде де тергев бериле.

Гёрюлген чараланы натижасында 2014-нчю йыл 4-нчю декабр­де ДР-ни Ич ишлер министерлиги маълумат къураллагъа йиберген билдиривюнде эсгерилген кюйде, 2014-нчю йылны он айыны ичинде урушбатчылыкъгъа байлавлу 361 жинаятчылыкъ аян этилген (гетген йыл шо санав 366 болгъан). Шо жинаятчылыкъланы инг де авурлары 216 керен болгъан. Оланы 195-и судлагъа бакъдырылгъан. Урушбатчылыкъгъа байлавлу  судлагъа берилген материаллагъа гёре бизин республикагъа шо жинаятчылыкъ ишлер 120 миллион 883 минг манат зарал гелтирген,

ДР-ни Ич ишлер министерлиги юрютген ахтарыв ишни натижасында  54 жинаятчы иш ёлбашчылар булан байлавлу деп эсгериле. ДР-ни Ич ишлер министерлигини бу йылны он айында урушбатчылыкъгъа къаршы гёрюлген чаралар, эсгерилген  баянлыкъда айтылагъан кюйде, республикада урушбатчылыкъ иш осал болмай. Шогъар гёре Дагъыстан Респуб­ликада Ич ишлер министерликни хас сайты ачылгъанлыкъны гьакъында да айтыла. О сайтны «Янгылыкълар» деген бёлюгюнде урушбатчылыкъгъа байлавлу аян этилген жинаятчы ишлер салына.  Ватандашлар учун «Урушбатчылыкъ болмасын» деген рубрика ачылгъан. Шо сайтда урушбат алывгъа къаршы болгъанда, ватандашлар не этме герегине англатыв бериле.

Урушбатчылыкъны алдын алмакъ учун агитация англатыв ишлер таманлыкъ этмейгени белгили. Мисал учун, урушбатчылыкъ чинк де кёп яйылгъан Сингапурну бизин газетни июн айда чыкъгъан номеринде эсгерген эдик. Сингапурну о замангъы премьер-министри Ли Куан Ю шо «аврувгъа» къаршы ябушув башлагъанда, ол урушбатчылыкъны енгежекге инанагъанлар аз болгъан. Премьер-министр  оьзюню ябушувун янгыз англатыв чаралар булан юрютмеген, мекенли ва кёп къатты чаралар да гёрген. Озокъда, ишни юрютмек учун комиссия да къурулгъан. Тек гёрюлеген чаралар бары да халкъгъа бирни йимик болгъан. Урушбат учун оьр гьаким де, къуллукъчу да бирни йимик такъсырлангъан.

Гьали о пачалыкъда урушбатчылыкъ не экени де унутулгъан. Мисал учун эсгерейик, о пачалыкъда урушбат алагъаны белгили болгъан къуллукъчугъа 100 минг доллар къоду салына, бары да мал-матагьы чыгъартылып алына ва шо адам он йылдан артыкъ болжалгъа туснакъ этилип тургъан.

 

А. ГЬАМЗАЕВ.

Авторизация
*
*
Регистрация
*
*
*
Согласны с условиями сайта?
Генерация пароля