Гетген йыл яйда Магьаммат агъасы, къатыны ва дёрт яшы булан, бай яшама сююп, Сириягъа гетген. Ол оьзю айтагъан кюйде, юрт хозяйство булан машгъул болма сюйген. Тек гючлю дав юрюлеген ерге тюшген.
«Мен бир улан булан таныш болгъан эдим. Ол улан магъа агъасы Сирияда экенни, ол оьзю де онда барма гьазир болагъанны айтды. Ондагъы гьал телевизорда гёрсетеген кюйде тюгюл, онда оьзюню уллу уью бар деп айта эди. Бир нече жумадан ол Тюркиягъа, ондан таба Сириягъа гетди. Ол магъа язгъан кюйде, онда дав булан байлавлу гьал ёкъ да ёкъ», – деп хабарлай Магьаммат.
Бираздан Магьаммат къатыны ва яшлары булан Тюркиягъа бара. Ондан оланы Сириягъа чыгъаралар. Сонг Магьамматны эки айгъа къатынындан ва яшларындан айыралар. Къатынын яшлары да булан, къатынлар турагъан общежитиеге онгаралар. Оьзюн буса агъасы да булан уьйренеген лагерге бакъдыралар. Уьйренген сонг оланы, савут да берип, ИГИЛ-ни якълама онгаралар. Магьаммат юрт хозяйство булан машгъул болма сюемен деп айтгъанда, ону он гюнге чунгургъа ташлайлар.
«Чунгурдан чыкъгъанда, магъа къолума савут алма тюшдю. Тек Аллагьны буйругъу булан мен ону къолламадым. Къатыным булан къачма сюйгенде, бизин тутдулар. Къатынымны общежитиеге элтгенлер, мени буса шо баягъы чунгургъа бу гезик 20 гюнге ташладылар», – дей Магьаммат.
Ондан чыкъгъан сонг Магьаммат дазудан бир нече агьлюню оьтгерген адамны таба. Тек ол адам ону дазудан чыгъарма сюймей.
«Ол адам магъа россиялылар булан иш гёрме ярамай деген буйрукъ бар деп айтды. Мен огъар кёп акъча таклиф этсем де, тавакалгъа барма сюймейгенин, о иш бек къоркъунчлу экенин айтды. Россияны ватандашлары булан бирев де иш гёрмежегин билдирди», – дей Магьаммат.
Шолай гьалны билген сонг ол ондан къачагъан ёлну оьзю излеп башлагъан. Ерли адамлар миналар салынгъан ерден таба къачагъанны ол гёрген. Оьзю айтгъан кюйде, ол шо майданда кёплер миналар атылып, оьлегенни де гёрген. Тек шо боевиклерден къутулмакъ учун янгыз бир ёл экенни де англагъан.
«Биз миналар салынгъан ерден оьтегенде, гелеген секундубуз ахырынчы болурму экен деп ойлаша эдик. Биз сав къалгъангъа Аллагьгъа разилик билдиребиз. Бизге дазугъа етишме имканлыкъ болду. Ондагъы элчиханада бизге уьюбюзге къайтмагъа кёмек этдилер. Бары да адамлагъа мени янгылышымны такрарламагъыз деп айтма сюемен», – дей Магьаммат.
Бизге билдирген кюйде, дазудан чыгъарагъанлар эки де уьлкени арасындагъы къыставуллу гьал саялы россиялылар булан иш гёрме сюймейлер. Алда дазудан чыгъарагъан адам гелимин тюрк дазучулар булан пайлап бола болгъан буса, гьали олай этме олар къоркъалар. Белгили адам айтгъан кюйде, гьалиге дазудан чыгъарып болагъан 8 адам бар. Оланы арасында уьзбеклер, тюрклер, сириялылар ва дагъыстанлылар бар. Оланы кёплери Афгъан давну ортакъчылары. Къачагъанланы дазудан чыгъармакъ да гелим гелтиреген тармакъгъа айлангъаны кёп бола. Шо гьакъ гюн сайын арта. Гьали сёйленеген кюйде, бир адамны дазудан чыгъармакъ учун олар 10 минг доллар ала дей.
ДР-ни террорчулукъгъа къаршы иш гёреген комиссиясы.
